Nunga dijanjihon Jahowa na laho jagaonna do si Jakkob, songon Ibana na manjaga si Abraham dohot si Isak. Di Haran do si Jakkob tinggal. Jala disi do ibana mangoli, marianakhon, jala gabe mamora.

Di sada tingki didok Jahowa ma tu si Jakkob, ‘Mulak ma ho tu huta hatubuanmu.’ Alani i, borhat ma si Jakkob dohot keluargana, mulak tu hutana. Di tonga dalan, didokkon pangurupi ni si Jakkob ma, ‘Nunga ro abangmu si Esau dohot 400 baoa!’ Dirimpu si Jakkob do naeng pamateon ni si Esau ibana dohot keluargana. Martangiang ma si Jakkob tu Jahowa, ‘Palua ma ahu sian abangku.’ Marsogotna i, disuru si Jakkob ma asa dilehon tu si Esau, domba, hambing, lombu, unta, dohot keledai.

Di borngin i, tingki sahalak ni si Jakkob, pajumpang ma ibana dohot sada suru-suruan manang malaikat! Margulat ma ibana dohot suru-suruan i sahat tu manogot. Nang pe hansitan si Jakkob, ndang olo ibana paluahon. Didok suru-suruan i ma, ‘Palua ma ahu.’ Alai asa pos roha ni si Jakkob na diurupi Jahowa ibana, didok ma, ‘Daong, ndang paluaonku ho molo ndang dipasu-pasu ho ahu.’

Ujungna, dipasu-pasu suru-suruan i ma si Jakkob. Diboto ibana ma, ndang loason ni Jahowa pamateon ni si Esau ibana.

Manogotna i, sian na dao diida si Jakkob ma si Esau raphon 400 baoa. Pintor ro ma si Jakkob tu jolo ni si Esau. Manungkap ma  ibana tu tano sampe pitu hali. Maringkat ma si Esau jala dihaol ma si Jakkob. Tangis ma nasida na dua. Dung i, mardame ma nasida. Menurutmu, songon dia do roha ni Jahowa mangida si Jakkob mengatasi parsoalan on?

Dung sae i, mulak ma si Esau tu hutana. Si Jakkob pe ditorushon ma pardalananna. Adong 12 anak ni si Jakkob. Goar ni nasida i ma, si Ruben, si Simeon, si Lepi, si Juda, si Dan, si Naptali, si Gad, si Aser, si Isasar, si Zebulon, si Josep, dohot si Benjamin. Dipangke Jahowa do anakna si Josep laho paluahon bangsona. Diboto ho do songon dia ceritana? Taida ma annon.