Zoova seli Zakɔbu kɛ ɔ́ sɛ́sɛ́ i kɛ nga ɔ fa sasali Abraamun nin Izaaki’n sa. Zakɔbu ko trannin Aran. Ɔ jali bla lɔ, ɔ wuli ba kpanngban. Yɛ ɔ ɲannin ninnge kpanngban kpa.

Cɛn kun’n, Zoova seli Zakɔbu kɛ: ‘Sa ɔ sin ɔ klɔ lɔ.’ Kɛ ɔ yoli sɔ’n, Zakɔbu nin i awlofuɛ mun be fali be klɔ atin’n. Kɛ bé kɔ́’n, sran wie mun be wa seli Zakɔbu kɛ: ‘Ɔ niaan bian Ezau su ba wɔ atin kpalɛ, ɔ nin sran ya nnan (400) yɛ be ba-ɔ.’ Zakɔbu buli i kɛ Ezau wá yó i bɔbɔ nin i awlofuɛ mun be like yaya. I sɔ’n ti’n srɛ kunnin i. Ɔ srɛli Zoova. Ɔ seli kɛ: ‘Yaci, de min min niaan bian Ezau sa nun.’ Kɛ aliɛ cɛnnin’n, Zakɔbu sunmannin sran kɛ be fa bua, nin boli, nin nannin, nin ɲɔnngɔnmɛn, ɔ nin aflunmun kpanngban be ko man Ezau.

Cɛn sɔ’n nun kɔnguɛ mɔ Zakɔbu i ngunmin o lɛ’n, ɔ wunnin anzi kun. Ɔ nin anzi’n be tuli ngondin. Be tuli lele aliɛ cɛnnin. Anzi’n yoli Zakɔbu i like yaya, sanngɛ Zakɔbu w’a yacimɛn i nun. Anzi’n seli i kɛ: ‘Yaci min nun maan n wɔ.’ Zakɔbu tɛli i su kɛ: ‘Sɛ w’a yraman min su’n, n su yaciman ɔ nun.’

Anzi’n yrali Zakɔbu su. Ɔ maan Zakɔbu wunnin i wlɛ kɛ Zoova su yaciman Ezau lɛ naan ɔ yo i like yaya.

Kɛ lika cɛnnin mɔ Zakɔbu mɛnnin i ɲin su niannin mmua lɔ’n, ɔ wunnin Ezau. Ɔ nin sran ya nnan (400) yɛ be ba-ɔ.  Zakɔbu dunnin i awlofuɛ mun be ɲrun mmua, kpɛkun ɔ kotoli i niaan bian’n i bo kpɛ nso. Ezau wanndili wa kpali Zakɔbu i atin, ɔ tɔli i nun. Kpɛkun be nɲɔn’n be sunnin. ?Wafa sɛ yɛ Zoova buli ajalɛ nga Zakɔbu fali’n niɔn?

I sin’n, Ezau sɛli i sin i awlo. Kpɛkun Zakɔbu kusu ɔli. Zakɔbu i mma mun be ti blu-nin-nɲɔn (12). Be dunman mun yɛ: Ribɛnin, Simeɔn, Levi, Zida, Dan, Nɛftali, Gadi, Azɛɛ, Isakaa, Zabulɔn, Zozɛfu, yɛ Bɛnzamɛn. Zoova fali Zakɔbu i mma mun be nun kun deli i sran mun. Ba sɔ’n yɛle Zozɛfu. ?A si like ng’ɔ yoli’n? Maan e nian.