Jehova i promes long Jekob se bambae i lukaot gud long hem, olsem we hem i lukaot gud long Ebraham mo Aesak. Jekob i go stap long ples ya Haran, hem i mared, i gat plante pikinini, mo i rij we i rij.

Afta we plante yia i pas, Jehova i talem long Jekob se: ‘Yu gobak long ples blong yu.’ Ale, Jekob mo famle blong hem oli wokbaot i go. Long rod, samfala oli kam talem long Jekob se: ‘!Brata blong yu Esao i stap kam, mo i gat 400 man wetem hem!’ Jekob i fraet se Esao bambae i mekem faet long hem mo famle blong hem, ale hem i prea long Jehova se: ‘Plis yu blokem brata blong mi, yu sevem mi.’ Long nekis dei, Jekob i sanem plante sipsip, nani, buluk, kamel, mo dongki, oli go long Esao olsem presen.

!Long naet ya, taem Jekob i stap hem wan, hem i luk wan enjel! Nao tufala i resling, mo tufala i gohed go kasem moning. Jekob i kasem kil be hem i no lego. Enjel i talem se: ‘Yu lego mi.’ Be Jekob i talem se: ‘!Nogat! !Mi no save lego yu! !Yu mas blesem mi fastaem!’

Ale, enjel ya i blesem Jekob. Nao Jekob i save se Jehova bambae i no letem Esao i spolem hem.

Long moning, Jekob i luk Esao mo 400 man blong hem oli stap kam longwe. Nao Jekob i go fastaem long famle blong hem, mo i bodaon seven taem long Esao. Esao i resis i kam long Jekob, mo  i putum han blong hem i goraon long hem. Nao tufala i krae we i krae, mo Jekob i mekem pis wetem Esao. ?Yu ting se Jehova i glad long Jekob from fasin we hem i mekem long brata blong hem?

Biaen, Esao i gobak long ples blong hem, mo Jekob tu i go long ples blong hem. Jekob i gat 12 pikinini boe we nem blong olgeta se: Ruben, Simeon, Livae, Juda, Dan, Naftali, Gad, Asere, Isakara, Sebulun, Josef, mo Benjamin. Jehova i yusum Josef blong sevem ol man blong Hem. ?Yu save wanem we hem i mekem? Bambae yumi luk long nekis stori.