Yéhôva a nga ka’ale Jacob na a ye ba’ale nye aval a nga ba’ale Abraham ba Isaac. Jacob a nga ke tabe Haran, ane a nga lu’u binga a biaé abui bon, nde a nga su’ulane bo nkukum.

Ane Yéhôva a nga jô Jacob na: ‘Bula’ane nlame wôé.’ Nde Jacob a nda bôte jé be nga té dulu. Nté be mbe zen, bôte béziñ be nga zu tôbane Jacob a jô nye na: ‘Monyoñ Ésaü a zu tôbane wo, ba be bôte 400 be ne nsamba!’ Jam ete e nga bo na Jacob a ko mbia woñ, amu a mbe a buni’i na Ésaü a zu wôé nda bôte jé ése. Ane a nga ye’elane Yéhôva, a jô nye na: ‘Ma ye’elane wo na ô kamane ma mo me monyañe wom.’ Môs ô nga tôé valé, Jacob a nga lôm Ésaü abui mintômba, bikela, benyak, bechameau, a bijakas.

Alu éte ébien, Jacob a nga yen éngele! Nde a nga taté na a juan a éngele ate; be nga juan akekui mame tyé. Jacob a mbe a nga wô’ô mintaé, ve teke jô’é. Ane éngele a nga jô nye na: ‘Suu ma me ke.’ Ve Jacob a nga yalane nye na: ‘Téké’é, mé jô’é wo fo’o ve nge wo taté botane ma.’

Nde éngele a nga botane Jacob. Ane Jacob a nga yeme na Yéhôva a vo’o jô’é na Ésaü a bo nye mbia jam éziñ.

Tyé éte ébien, Jacob a nga yen Ésaü a za’a ôyap a bôte bé 400. Nde Jacob a nga ke ôsu, a li’i nda bôté jé mvus; ane a nga  kute meboñe si biyoñe zangbwal. Ésaü ke a nga bumu mbil a ke koone monyañ, a wubane nye. Nde bese bebaane be nga bôé ñyôn, ane be nga late ngbwa. Wo simesane na Yéhôva a nga yen avale Jacob a nga kôm ajôete aya?

Mvuse ya valé, Ésaü ba Jacob be nga ke môt ase nda jé. Jacob a nga biaé bo be fam 12. Biyôlé biap bi mbe Ruben, Siméon, Lévi, Juda, Dan, Nephthali, Gad, Aser, Issacar, Zabulon, Joseph, a Benjamin. Yéhôva a nga belane Joseph, mone wua ya bone bete na, a kôté ayoñe dé. Ye wo yem aval avé? Jame bia zu yene nde le.