Si Jehova nagsaad nga iyang protektahan si Jacob pareho sa iyang gihimo kang Abraham ug Isaac. Si Jacob nagpuyo sa Haran ug didto siya naminyo, midaghan ang anak, ug nahimong dato kaayo.

Unya si Jehova miingon kang Jacob: ‘Uli sa inyo.’ Busa mipauli si Jacob uban sa iyang pamilya. Sa ilang pagbiyahe, dihay mga tawo nga mitagbo nila ug miingon: ‘Nagpadulong ang imong igsoon nga si Esau, ug kauban niya ang 400 ka tawo!’ Nahadlok si Jacob kay basig si Esau dunay himoong daotan kaniya ug sa iyang pamilya. Miampo siya kang Jehova: ‘Palihog proteksiyoni ko.’ Pagkasunod adlaw, nagpadala siyag regalo kang Esau​—daghang karnero, kanding, baka, kamelyo, ug asno.

Pagkagabii, dihang nag-inusara si Jacob, nakakita siyag anghel! Dayon ang anghel nakiglayog niya hangtod sa buntag. Bisag nabun-og si Jacob, wala gyod siya mosurender. Ang anghel miingon: ‘Buhii ko.’ Pero si Jacob miingon: ‘Dili ti ka buhian kon dili ko nimo panalanginan.’

Gipanalanginan sa anghel si Jacob. Busa segurado si Jacob nga dili mosugot si Jehova nga buhatan siyag daotan ni Esau.

 Pagkabuntag, nakita ni Jacob nga duol na si Esau uban ang 400 ka tawo. Gisugat ni Jacob ang iyang igsoon ug mihapa siyag kapito. Midagan si Esau ug gigakos si Jacob. Mihilak silang duha ug nag-uli. Unsa kahay gibati ni Jehova sa gihimo ni Jacob sa pagsulbad sa ilang problema ni Esau?

Dayon miuli si Esau sa iyang balay, ug si Jacob miadto sa iyang destinasyon. Dunay 12 ka anak si Jacob​—si Ruben, Simeon, Levi, Juda, Dan, Neptali, Gad, Aser, Isacar, Zabulon, Jose, ug Benjamin. Gigamit ni Jehova si Jose aron luwason ang Iyang katawhan. Kabalo ba ka kon giunsa siya paggamit ni Jehova? Mahibaloan nato ang tubag sa sunod nga mga leksiyon.