Yehowa wo Yakob shi akɛ, ebaabu ehe taakɛ ebu Abraham kɛ Isak he lɛ. Yakob yahi he ko ni atsɛɔ lɛ Haran. Ebote gbalashihilɛ mli yɛ jɛmɛ, efɔ bii babaoo, ni ená nibii pii.

Sɛɛ mli lɛ, Yehowa kɛɛ Yakob akɛ: ‘Kuu osɛɛ kɛya omaŋ.’ No hewɔ lɛ, Yakob kɛ eweku lɛ je gbɛfãa kakadaŋŋ nɛɛ shishi. Be ni amɛyaa yɛ gbɛ lɛ nɔ lɛ, mɛi komɛi bakɛɛ Yakob akɛ: ‘Onyɛmi nuu Esau miiba, ni hii 400 sɔŋŋ fata ehe!’ Yakob tsui fã akɛ Esau baaye lɛ kɛ eweku lɛ awui. No hewɔ lɛ, esɔle ekpa Yehowa fai akɛ: ‘Ofainɛ, heremɔ mi kɛjɛ minyɛmi nuu lɛ dɛŋ.’ Enɔ jetsɛremɔ lɛ, Yakob tsu ni ayake Esau gwantɛŋi, abotiai, tsinai, afukpɔŋɔi, kɛ teji babaoo.

Nakai gbɛkɛ lɛ, be ni eshwɛ Yakob kome too lɛ, ena ŋwɛibɔfo ko! Ŋwɛibɔfo lɛ kɛ lɛ bɔi nɔmɔ, ni amɛnɔ aahu kɛyashi leebi. Eyɛ mli akɛ Yakob pila moŋ, shi etee nɔ ekɛ ŋwɛibɔfo lɛ nɔ. Ŋwɛibɔfo lɛ kɛɛ lɛ akɛ: ‘Ŋmɛɛmɔ mihe ni maya.’ Shi Yakob kɛɛ lɛ akɛ: ‘Dabi, miŋmɛɛɛ ohe, ja ojɔɔ mi dã.’

No hewɔ lɛ, ŋwɛibɔfo lɛ jɔɔ Yakob. Enɛ hã ena akɛ, Yehowa eŋmɛŋ gbɛ ni Esau aye lɛ awui ko.

Nakai leebi lɛ, Yakob na Esau kɛ hii 400 lɛ ni amɛmiiba yɛ shɔŋŋ. Ejo foi oya kɛtsɔ eweku lɛ hiɛ, ni ekula shi yɛ Esau hiɛ shii kpawo. Esau hu jo foi kɛbanina lɛ, ni efua lɛ. Nyɛmimɛi  enyɔ lɛ bɔi yaafo, ni amɛsaa bei ni yɔɔ amɛteŋ lɛ. Be ni Yehowa na bɔ ni Yakob tsu sane lɛ he nii ehã lɛ, te osusuɔ akɛ Yehowa nu he ehã tɛŋŋ?

Sɛɛ mli lɛ, Esau ku esɛɛ kɛtee shĩa, ni Yakob hu tsa egbɛfãa lɛ nɔ. Yakob fɔ bihii 12. Amɛgbɛ́i ji, Ruben, Simeon, Levi, Yuda, Dan, Naftali, Gad, Asher, Isakar, Zebulon, Yosef, kɛ Benyamin. Yehowa tsɔ Yakob bihii lɛ ateŋ mɔ kome, ni ji Yosef nɔ ebaa E-webii lɛ ayi. Ani ole nɔ ni ba? Hã wɔkwɛ.