Nüküjain Jeʼwaa nümüin Jacob naaʼinmajüinjachin nia, maʼaka naaʼinmajüin paala Abraham nümaa Isaac. Chajachi kepiain Jacob suluʼu wanee mma Harán münüsü. Kasaatshi nia chayaa, wainma nüchonnii otta wayuu washirü nia.

«Piitaa püchikuaʼa eere nuumain püshi», nümakalaka Jeʼwaa nümüin Jacob. Müshijeseʼe nuʼunuin sümaa nüpüshi. Wopuluʼupa nia, namaka waneinnua nüchepchia nümüin: «Iseeichi Esaú wapanapa namaa 400 wayuu». Mmotshi Jacob seema jamajüin nia sümaa nüpüshi nutuma Esaú. Nuʼuraajaka nümüin Jeʼwaa sünain maa: «Pükaaliinja taya nuulia chi tepayakai». Waneemüin kaʼi nuluwataaka Jacob nümüin Esaú watta saalii anneerü, kaaʼula, paaʼa, kameeya sümaa püliiki.

Soʼu aikat tia, nümüiwaʼapa Jacob, niʼraka wanee aapiee. Naapiraaka nümaa chi aapieekai. Ooʼulaʼaleeshia waneemüin kaʼi. Eejiraashi maʼin Jacob mayaapejeʼe neewaain. «Puuʼulaa toʼunai», nümaka chi aapieekai nümüin. «Nnojo. Piiʼiyata paʼanasia tamüin palajana, tajüteechinjaʼa achiki pia», nümaka Jacob.

Niiʼiyataka naʼanasia nümüin Jacob. Nütüjaaka saaʼu nükaaliinjeechin nia Jeʼwaa suulia jamajüin nutuma Esaú.

Soʼu tia, maʼaka wattaʼa maalü, niʼrüin Jacob Esaú wattajee namaa 400 wayuu nümaajana. Nuʼunaka Jacob süpüleerua nüpüshi nüpanapa Esaú, nüsapainkaka nia akaratshitua. Nuwataaka Esaú nüpanapa Jacob sümaa nukoʼojooin nünain. Naʼyalajakalaka piamaleʼeya otta anajiraaka naya. ¿Anasüche nümüin Jeʼwaa tü naainjakat Jacob? ¿Jamüsüjaʼa saaʼin pümüin?

 Süchikijee tia, niitaaka Esaú nipialuʼumüin otta Jacob oʼunushi eemüinjachire nia. 12 nüchonnii Jacob. Anuu nanülia: Rubén, Simeón, Leví, Judá, Dan, Neftalí, Gad, Aser, Isacar, Zabulón, José otta Benjamín. Shiasaʼa mapa, oʼttaashii nutuma Jeʼwaa nüpüshi Jacob nükajee José, wanee nüchon Jacob. ¿Pütüjawee aaʼu jamüin sukuwaʼipa nutuma? Jooʼu wekirajaai sünain.