Jehovah dopà na Jakọbu dọ emi na basi hihọ́na ẹn dile emi wà na Ablaham po Isaki po do. Jakọbu sawhé do otò Halani tọn mẹ, e sọ wlealọ to finẹ bo do whẹndo daho de ai bosọ jẹ adọkun taun.

To godo mẹ, Jehovah dọna Jakọbu dọ: ‘Lẹkọyi otò towe mẹ.’ Enẹwutu, Jakọbu po whẹndo etọn po bẹ gbejizọnlin gaa de jẹeji nado lẹkọyi whé. To whenue Jakọbu to aliji, mẹdelẹ wá e dè bo dọna ẹn dọmọ: ‘Nọvisunnu towe Esau ja, podọ sunnu 400 wẹ tin po e po!’ Jakọbu dibu dọ Esau na wá gbleawuna ewọ po whẹndo etọn po. E hodẹ̀ hlan Jehovah dọmọ: ‘Jaale, whlẹn mi sọn alọ nọvisunnu ṣie tọn mẹ.’ To wunkẹngbe, Jakọbu do lẹngbọ, gbọgbọẹ, oyìn, kanklosọ́ po kẹtẹkẹtẹ susu po hlan Esau taidi nunina de.

To zánmẹ gbenẹgbe, whenue Jakọbu to edeṣo, e mọ angẹli de! Angẹli lọ sọ jẹ ahidi hẹ ẹ ji. Yé diahi kakajẹ afọnnu. Dile etlẹ yindọ Jakọbu gbleawu, e ma jogbe. Angẹli lọ dọna ẹn dọ: ‘Gbọ ma yì.’ Amọ́, Jakọbu dọmọ: ‘Lala, adavo hiẹ dona mi whẹ́.’

To godo mẹ, angẹli lọ dona Jakọbu. Todin, Jakọbu yọnẹn dọ Jehovah ma na dike Esau ni gbleawuna emi.

To afọnnu enẹ, Jakọbu pọ́n nukọn hlan bo mọ Esau po sunnu 400 etọn lẹ po. Jakọbu jẹnukọnna whẹndo etọn bo  dẹ́ do odò na nọvisunnu etọn whla ṣinawe. Esau họ̀nwezun yì pé Jakọbu bo gbò e fán. Nọvisunnu awe lọ lẹ sọ bẹ avi bo basi jijọho. Numọtolanmẹ tẹwẹ a lẹndọ Jehovah na ko tindo to whenue e mọ lehe Jakọbu didẹ ninọmẹ enẹ do?

To godo mẹ, Esau lẹkọyi owhé etọn gbè bọ Jakọbu lọsu lẹkọyi whé. Visunnu 12 wẹ Jakọbu tindo. Yinkọ yetọn lẹ wẹ Leubẹni, Simeoni, Levi, Juda, Dani, Naftali, Gad, Aṣeli, Isakali, Zebuluni, Josẹfu po Bẹnjamini po. Jehovah yí dopo to visunnu enẹlẹ mẹ—enẹ wẹ Josẹfu—zan nado whlẹn omẹ Etọn lẹ. Be a yọ́n lehe enẹ jọ gbọn ya? Gbọ mí ni pọ́n.