Si Jehova nagpromisa kay Jacob nga proteksionan niya sia pareho sa ginhimo niya kay Abraham kag kay Isaac. Nag-istar si Jacob sa lugar nga gintawag nga Haran, kag didto sia nakapangasawa. Nagdaku ang iya pamilya kag nangin manggaranon sia.

Sang ulihi ginsilingan ni Jehova si Jacob: ‘Magpauli ka.’ Gani si Jacob kag ang iya pamilya naglakat sing malayo para magpauli. Sa dalan pa lang, ginsilingan sang pila ka tawo si Jacob: ‘Nagapakadto na diri ang imo utod nga si Esau, kag may upod sia nga 400 ka tinawo!’ Nahadlok si Jacob nga basi halitan sia ni Esau kag ang iya pamilya. Nangamuyo sia kay Jehova: ‘Palihug luwasa ako sa akon utod.’ Pagkaaga, ginpadal-an ni Jacob si Esau sing madamo nga karnero, kanding, baka, kamelyo, kag mga asno bilang regalo.

Sa sina nga gab-i, sang si Jacob lang isa, nakita niya ang isa ka anghel! Nagdumugay sila sang anghel. Nagdumugay sila asta sa aga. Bisan pa nasakitan si Jacob, wala sia nag-untat. Ang anghel nagsiling: ‘Buy-i ako.’ Pero nagsiling si Jacob: ‘Indi ko ikaw pagbuy-an kon indi mo ako pagpakamaayuhon.’

Ginpakamaayo gid man sang anghel si Jacob. Nahibaluan karon ni Jacob nga indi magpasugot si Jehova nga halitan sia ni Esau.

 Sa sina nga aga, nagtulok si Jacob sa malayo kag nakita niya si Esau kag ang 400 ka tinawo sini. Nag-una si Jacob sa iya pamilya kag nagluhod sia kag nagduko sa atubangan sang iya utod sing pito ka beses. Nagdalagan si Esau palapit kay Jacob kag naghakos sa iya. Naghibi sila nga mag-utod kag nag-ayuhay sila liwat nga duha. Ano sa banta mo ang ginbatyag ni Jehova sa ginhimo ni Jacob?

Sang ulihi, nagpauli si Esau kag amo man si Jacob. Si Jacob may 12 ka bata nga lalaki. Ang ila ngalan amo si Ruben, si Simeon, si Levi, si Juda, si Dan, si Neptali, si Gad, si Aser, si Isacar, si Zebulon, si Jose, kag si Benjamin. Ang isa niya ka bata nga si Jose gingamit ni Jehova sa pagluwas sa Iya katawhan. Kabalo ka bala kon paano? Tan-awon naton.