Jehova wa kwizikira Jakob kutja me mu yama tjimuna tja yamene Abraham na Isak. Jakob wa katura mehi raHaran. Nu ingo okakakupira, a kahara eṱunḓu enene na rire omutumbe tjinene.

Kombunda Jehova wa raera Jakob na tja: ‘Yaruka kehi roye.’ Okutja Jakob neṱunḓu re va toora ouyenda oure okuyaruka. Ngunda ave ri mondjira ovandu tjiva ve ya ku Jakob nave tja: ‘Erumbi roye Esau meya kove puna ovarumendu 400!’ Jakob wa urumine tjinene kutja Esau ma vanga okumuhihamisa puna eṱunḓu re. Eye wa kumba ku Jehova a tja: ‘Arikana ndji yama komazenge werumbi randje.’ Eyuva nda kongorera ko Jakob wa hindira Esau oviyandjewa vyozonḓu, ozongombo, ozongombe, ozongamero nousino.

Mouṱuku mbo ngunda Jakob a ri erike, eye wa muna omuengeli! Omuengeli wa kondja okupirikiha kuna Jakob. Owo va kondja ngandu omuhuka omunene. Nandarire kutja omuengeli we mu hihamisa, Jakob kena pe muesa. Omuengeli wa tja: ‘Ndjesa mbi yende.’ Nungwari Jakob wa tja: ‘Ami himee ku esa nga tji we ndji sere ondaya.’

Nomuengeli wa sera Jakob ondaya. Okuzambo Jakob aa tjiwa kutja Jehova kamaa yandjere Esau okumuhihamisa.

Omuhuka omunene mbo Jakob wa muna Esau novarumendu 400 okuza kokure. Jakob a rire tja hongorere eṱunḓu re ne keripeta  povikando 7 komungu werumbi re. Esau wa utuka ku Jakob nerimanga mu ye, arire tji va utu okurira nave hangana. Mo munu kutja Jehova aa munu ko vi ohunga nomuano Jakob mbwa tjinda ongaro ndji?

Kombunda Esau wa yaruka koye nu Jakob wina wa ya koye. Jakob wa ri novanatje ovazandu 12. Omana wawo yari Ruben, Simeon, Levi, Juda, Dan, Naftali, Gad, Aser, Isakar, Sebulon, Josef, Benjamin. Umwe wovazandu mba, wena Josef wa ungurisiwa i Jehova okuyama otjiwaṋa tje. Mo tjiwa kutja omomuano uṋe? Indjo tu tare.