Inkari ni Jehova a protektaranna ni Jacob a kas iti inaramidna idi kada Abraham ken Isaac. Nagyan ni Jacob iti lugar a naawagan iti Haran. Nangasawa sadiay, naaddaan iti dakkel a pamilia, ken nagbalin a nakabakbaknang.

Maysa nga aldaw, imbaga ni Jehova ken Jacob: ‘Agsublika iti lugar a dimmakkelam.’ Nagbiahe ngarud ni Jacob ken ti pamiliana iti adayo a lugar. Idi agbibiaheda, adda dagiti napan nangibaga ken Jacob: ‘Um-umay ni Esau a kabsatmo. Adda kaduana nga 400 a lallaki!’ Mabuteng ni Jacob a baka saktan isuna ni Esau agraman ti pamiliana isu a nagkararag ken Jehova: ‘Pangngaasim, isalakannak manipud ken kabsatko.’ Kabigatanna, nangipatulod ni Jacob ken Esau iti adu a karnero, kalding, baka, kamelio, ken asno.

Karabiyanna, idi agmaymaysa ni Jacob, adda nakitana nga anghel! Nakigabbo ti anghel kenkuana agingga a naglawag. Uray no nasaktanen ni Jacob, saan a simmuko. Kinuna ti anghel: ‘Ibbatannak.’ Ngem kinuna ni Jacob: ‘Saanka a palubosan no dinak bendisionan.’

Binendisionan met laeng ti anghel ni Jacob. Ammo itan ni Jacob a saan nga ipalubos ni Jehova a saktan isuna ni Esau.

Iti dayta a bigat, nakita ni Jacob ni Esau ken ti 400 a lallaki iti adayo. Immun-una nga immasideg ni Jacob ngem iti pamiliana  ket namimpito a nagrukob ken kabsatna. Timmaray nga immasideg ni Esau ken Jacob ket inarakupna. Nagsinnangit ti agkabsat ket nagkappiada. Ania ngata ti narikna ni Jehova iti inaramid ni Jacob?

Idi agangay, nagawid ni Esau, ken intuloy ni Jacob ti panagbiahena. Naaddaan ni Jacob iti 12 nga annak a lallaki—da Ruben, Simeon, Levi, Juda, Dan, Neftali, Gad, Aser, Isacar, Zabulon, Jose, ken Benjamin. Ni Jose ti inusar ni Jehova a mangisalakan kadagiti agdaydayaw kenkuana. Ammom no kasano? Kitaenta.