Jihova ọ ya eyaa kẹ Jekọp nọ ọ te jọ kugbei wọhọ epanọ ọ jọ kugbe Abraham avọ Aiziki na. Jekọp ọ tẹ jẹ rria ẹwho nọ a re se Heran, ọ tẹ jọ etẹe wo aye, yẹ emọ, je fe gaga.

Nọ oke jọ o vrẹ no, Jihova ọ tẹ ta kẹ Jekọp nọ: ‘Zihe kpobọ ẹwho ra.’ Fikiere, Jekọp avọ uviuwou riẹ a tẹ ruọ edhere muhọ ezihe kpo. Nọ a nya te oria jọ no, ahwo jọ a tẹ nyaze te vuẹ Jekọp nọ: ‘Esọ oniọvo ra ọ be nyaze, yọ ezae egba ene (400) a rrọ kugbei.’ Ozọ u te mu Jekọp gaga inọ Esọ ọ be nyaze ti kpei avọ uviuwou riẹ no. Ọ tẹ lẹ se Jihova nọ: ‘Ivie siwi omẹ no obọ oniọvo mẹ.’ Ẹdẹ nọ o lele i rie, Jekọp o te vi igodẹ, ewe, imẹlu, ekamẹle, gbe eketekete buobu se Esọ.

Okenọ Jekọp ọvo ọ jọ oria evaọ aso ẹdẹ yena, ọ tẹ ruẹ enjẹle jọ. Enjẹle na avọ Jekọp a te mu abọ họ emu. A muabọ bẹsenọ oke o rọ ke. Dede nọ Jekọp ọ nwoma, ọ kẹ enjẹle na uvẹ hẹ. Enjẹle na ọ tẹ ta kẹe nọ: ‘Kẹ omẹ uvẹ me kpo.’ Rekọ Jekọp ọ tẹ ta kẹe nọ: ‘Ijo, whọ rẹ ghale omẹ taure me te siobọno owhẹ.’

Ukuhọ riẹ, enjẹle na ọ tẹ ghale Jekọp. Onana u ru Jekọp riẹ nọ Jihova ọ te kuvẹ re Esọ o kpei hi.

Ohiohiẹ ẹdẹ yena, Jekọp ọ tẹ jọ ugbothabọ ruẹ Esọ avọ ezae egba ene (400) nọ e rrọ kugbei. Jekọp ọ tẹ kake nyabru Esọ yọ  ahwo uviuwou riẹ a rrọ obemu, o te guzou kpotọ kẹe isiahrẹ. Esọ ọ tẹ dhẹ bru Jekọp jẹ nabe gbalọ iẹe. Aimava a te muhọ ẹviẹ jẹ ruẹrẹhọ kugbe ohwohwo. Ẹvẹ who roro nọ Jihova o rri oghẹrẹ nọ Jekọp ọ rọ ruẹrẹhọ kugbe oniọvo riẹ na?

Ukuhọ riẹ, Esọ o te zihe kpobọ uwou riẹ, Jekọp o te zihe kpohọ uwou riẹ re. Jekọp o yẹ emezae 12. Edẹ rai họ Rubẹn, Simiọn, Livai, Juda, Dan, Naftalae, Gad, Asha, Isaka, Zẹbulọn, Josẹf, gbe Bẹnjamin. Ọnọ a re se Josẹf evaọ usu rai na, Jihova o ro siwi ahwo riẹ. Kọ whọ riẹ oghẹrẹ nọ o ro ru ei? Ma ti se kpahe onana evaọ obaro.