Jeová promete Jakó ma el ta protejeba el sima el protejeba Abraon ku Izaki. Jakó bai mora na un lugar ki txomaba Aran. El kaza, se família bira grandi i el bira riku la na Aran.

Má, Jeová fla Jakó: ‘Bai pa bu téra.’ Nton, Jakó ku se família faze un viaji lonji pa volta otu bês. Duránti viaji, es fla Jakó: ‘Bu irmon Izaú sta na kaminhu. El tene 400 ómi djuntu ku el!’ Jakó xinti medu di Izaú prujudika el ku se família. El faze orason pa Jeová: ‘Favor, ka bu dexa nha irmon faze-m nada’. Na kel otu dia Jakó manda Izaú txeu prezenti: ovelhas, kabras, bakas, kamelus i burus.

Na kel noti, kantu Jakó staba el sô, el odja un anju. Kel anju kumesa ta luta ku el. Es luta ti manxe. Nbóra Jakó staba ku dór, el ka dizisti. Anju fla-l: ‘Dexa-m bai’. Má Jakó fla: ‘Nau, bu ka ta bai timenti bu ka abensua-m.’

Nton, kel anju abênsua Jakó. Asi, Jakó fika ta sabe ma Jeová ka ta dexaba Izaú prujudika-l.

Na kel palmanhan Jakó odja Izaú ku 400 ómi di lonji ta ben. Jakó pasa pa frenti di se família i el nbaxa dianti di  se irmon 7 bês. Izaú kóre pa Jakó i el brasa-l. Es txora i es faze pas ku kunpanheru. Modi ki bu ta atxa ma Jeová xinti ku kuzê ki Jakó faze?

Dipôs Izaú bai pa se kaza i Jakó kontínua se viaji. Jakó tevi 12 fidju. Ses nómi éra: Ruben, Simion, Levi, Judá, Dan, Nafitali, Gadi, Azer, Isakar, Zebulon, Juzé i Benjamin. Jeová uza Juzé ki éra un di kes fidju di Jakó pa salva Se povu. Bu sabe modi ki el faze kel-li? Nu ben odja.