Jehova nĩ eerire Jakubu atĩ nĩ ekũmũgitĩra o ta ũrĩa agitĩire Iburahimu na Isaaka. Jakubu aathire gũikara Harani, akĩhikanĩria kuo, akĩgĩa na famĩlĩ nene, na agĩtonga mũno.

Thutha ũcio Jehova nĩ eerire Jakubu ũũ: ‘Coka kũrĩa waciarĩirũo.’ Nĩ ũndũ ũcio Jakubu na famĩlĩ yake makĩambĩrĩria thabarĩ ya gũcoka. Marĩ o njĩra-inĩ magĩthiĩ, ndungata ciake nĩ ciokire kũrĩ we ikĩmwĩra: ‘Mũrũ wa nyũkwa Esau nĩ mũũku marĩ hamwe na arũme 400!’ Jakubu nĩ eetigagĩra Esau ndakamwĩke ũũru hamwe na famĩlĩ yake. Aahoire Jehova ũũ: ‘Ndagũthaitha ndũkareke mũrũ wa maitũ anjĩke ũũru.’ Mũthenya ũyũ ũngĩ Jakubu nĩ aatũmanĩire Esau kĩheo kĩa ng’ondu, mbũri, ng’ombe, ngamĩra, na ndigiri.

Ũtũku ũcio rĩrĩa Jakubu aarĩ wiki, nĩ onire mũraika! Mũraika ũcio nĩ aambĩrĩirie kũrũndana nake. Maarũndanire nginya nginya gũgĩkĩa. O na gũtuĩka Jakubu nĩ aaguraririo, ndaakuire ngoro. Mũraika ũcio amwĩrire ũũ: ‘Rĩu reke thiĩ.’ Ĩndĩ Jakubu akĩmwĩra: ‘Ndũgũthiĩ ũtandathimĩte.’

Thutha ũcio mũraika ũcio nĩ aarathimire Jakubu. Ũndũ ũcio nĩ watũmire Jakubu amenye atĩ Jehova ndangĩarekire Esau amwĩke ũũru.

Rũcinĩ rũu, Jakubu nĩ aarorire na akĩona Esau arĩ haraihu marĩ na arũme 400. Jakubu aathire arĩ mbere ya famĩlĩ  yake na akĩinamĩrĩra mbere ya mũrũ wa nyina maita mũgwanja. Esau aateng’erire kũrĩ Jakubu na akĩmũhĩmbĩria. Maarĩranĩire hamwe marĩ erĩ na magĩcokia thayũ. Ũgwĩciria Jehova aaiguire atĩa nĩ ũndũ wa ũrĩa Jakubu aacokirie thayũ?

Thutha ũcio Esau agĩcoka gwake mũciĩ, nake Jakubu agĩthiĩ na mbere na thabarĩ. Jakubu aarĩ na anake 12. Meetagwo Reubeni, Simeoni, Lawii, Juda, Dani, Nafitali, Gadi, Asheri, Isakaru, Zebuluni, Jusufu, na Benjamini. Ũmwe wa anake acio ũrĩa wetagwo Jusufu, nĩwe Jehova aahũthĩrire kũhonokia andũ ake. Hihi nĩ ũĩ eekire ũguo atĩa? Nĩ tũkuona.