တၢ်မၤလိ ၁၃
စီၤယၤကိာ်ဒီးစီၤဧ့ၡီၤ မၤဃူဖိးလိာ်က့ၤအသး
ယဟိဝၤယွၤအၢၣ်လီၤအီလီၤ စီၤယၤကိာ်လၢ ကဒီသဒၢအီၤဒ်သိး အဒီသဒၢတ့ၢ်စီၤအၤဘြၤဟၣ် ဒီးစီၤအံၤစဲးန့ၣ်လီၤ. စီၤယၤကိာ်လဲၤအိၣ်ဝဲလၢ ဝ့ၢ်ဟၤရၣ်အပူၤလီၤ. ဖဲန့ၣ်န့ၣ် စီၤယၤကိာ်ဟံးန့ၢ် အမါဒီး အဝဲအိၣ်ထီၣ်ဒီးအဟံၣ်ဖိဃီဖိဖးဒိၣ်တဒူၣ်ဒီး ကဲဒိၣ်ထီၣ်ဝဲလီၤ.
လၢခံ ယဟိဝၤယွၤတဲဘၣ်စီၤယၤကိာ်လၢ– ‘က့ၤဆူ နအိၣ်တၢ်လီၢ်တက့ၢ်.’ လၢတၢ်န့ၣ်အဃိ စီၤယၤကိာ်ဒီးအဟံၣ်ဖိဃီဖိတဖၣ် စးထီၣ်က့ၤဝဲလီၤ. လၢကျဲန့ၣ် ပှၤတနီၤဟဲလၢစီၤယၤကိာ်အအိၣ်ဒီး တဲဘၣ်အီၤလၢ– ‘နဝဲၢ်ခွါစီၤဧ့ၡီၤ ဒီးအပှၤအဂၤ ၄၀၀ ဟဲဝဲလံ.’ စီၤယၤကိာ်ပျံၤဝဲလၢ စီၤဧ့ၡီၤ ကမၤဘၣ်ဒိအီၤ ဒီးအဟံၣ်ဖိဃီဖိလီၤ. စီၤယၤကိာ်ဃ့ဘါထုကဖၣ်တၢ်ဆူ ယဟိဝၤယွၤအအိၣ်ဒီး တဲဝဲလၢ– ‘ဝံသးစူၤ မၤပူၤဖျဲးယၤလၢ ယဝဲၢ်ခွါအစုပူၤတက့ၢ်.’ လၢခံတနံၤန့ၣ် စီၤယၤကိာ်ဆှၢန့ၢ် စီၤဧ့ၡီၤတၢ်ဟ့ၣ်လၢအမ့ၢ် သိ, မဲာ်တဲးလဲး, ဂီၤဖံး, ကီၤလၤအူးဒီး ကသ့ၣ်ယီၤတဖၣ်လီၤ.
နၤဝဲန့ၣ် ဖဲစီၤယၤကိာ်အိၣ်ဝဲထဲတဂၤအခါ အဝဲထံၣ်ဝဲမူခိၣ်ကလူးတဂၤလီၤ. မူခိၣ်ကလူးတဂၤအံၤ စးထီၣ်ကနိလိာ်အသးဒီး စီၤယၤကိာ်တုၤလၢ မုၢ်ဆ့ၣ်ဝါထီၣ်တစုလီၤ. စီၤယၤကိာ်ဘၣ်ဒိ သနာ်က့ အဝဲတတူၢ်ၡူအသးဘၣ်. မူခိၣ်ကလူးတဲဘၣ်အီၤလၢ– ‘ပျၢ်ယၤ,’ ဘၣ်ဆၣ် စီၤယၤကိာ်တဲဘၣ်အီၤလၢ– ‘နမ့ၢ်တဆိၣ်ဂ့ၤယၤန့ၣ် ယတပျၢ်နၤဘၣ်.’
လၢခံ မူခိၣ်ကလူးဆိၣ်ဂ့ၤစီၤယၤကိာ်လီၤ. ခဲအံၤန့ၣ် စီၤယၤကိာ်သ့ၣ်ညါဝဲလၢ ယဟိဝၤယွၤ တပျဲဝဲလၢ စီၤဧ့ၡီၤကမၤဆါအီၤဘၣ်.
ဖဲမုၢ်ဆ့ၣ်ဝါထီၣ်အခါ စီၤယၤကိာ်ကွၢ်စိတၢ်လၢအယံၤ ဒီးထံၣ်ဝဲလၢ စီၤဧ့ၡီၤဒီးအပှၤအဂၤ ၄၀၀ ဟဲဝဲလီၤ. စီၤယၤကိာ်လဲၤလၢ အဟံၣ်ဖိဃီဖိအမဲာ်ညါ ဒီးတီၤလီၤကဒွံကျိာ်လၢ စီၤဧ့ၡီၤအမဲာ်ညါနွံဘျီလီၤ. စီၤဧ့ၡီၤလဲၤဃ့ၢ်ဆူစီၤယၤကိာ်အအိၣ် ဒီးဖိးဟုအီၤလီၤ. အဝဲသ့ၣ်ဟီၣ်ဝဲဒီးမၤဃူမၤဖိးလိာ်က့ၤအသးလီၤ. စီၤယၤကိာ်မၤဃူမၤဖိးလိာ်အသး ဒီးအဝဲၢ်ခွါစီၤဧ့ၡီၤန့ၣ် နဆိကမိၣ်ယဟိဝၤယွၤအသးကမၤအသးဒ်လဲၣ်.
လၢခံ စီၤဧ့ၡီၤက့ၤဆူအဟံၣ် ဒီးစီၤယၤကိာ်စ့ၢ်ကီး က့ၤဝဲဆူအအိၣ်တၢ်လီၢ်လီၤ. စီၤယၤကိာ်အိၣ်ဒီး အဖိခွါ ၁၂ ဂၤလီၤ. အဝဲသ့ၣ်အမံၤမ့ၢ်ဝဲ စီၤရူၤဘ့ၣ်, စီၤစူၤမ့းအိၣ်, စီၤလ့ၤဝံ, စီၤယူဒၤ, စီၤဒၣ်, စီၤနးသၤလံ, စီၤကး, စီၤအၤၡ့ၢ်, စီၤယံးစၣ်ကၢ်, စီၤစဘူလိၣ်, စီၤယိၤသး ဒီးစီၤဘံၣ်ယၤမံၣ်လီၤ. ဒီးစီၤယိၤသးန့ၣ် မ့ၢ်ပှၤလၢယဟိဝၤယွၤ သူအီၤဒ်သိးကမၤပူၤဖျဲးဝဲ အပှၤဂီၢ်မုၢ်အဂီၢ်လီၤ. ကစၢ်ယွၤသူအီၤဒ်လဲၣ်န့ၣ် မ့ၢ်နသ့ၣ်ညါဧါ. ပကကွၢ်သကိးတၢ်ဂ့ၢ်အံၤလၢ တၢ်မၤလိလၢခံတခါအပူၤလီၤ.
“အဲၣ်သုဒုၣ်သုဒါတက့ၢ်. ဒီးပှၤလၢအဆိၣ်အၢသုန့ၣ် ဆိၣ်ဂ့ၤအီၤတက့ၢ်. ဒီးပှၤလၢအသးဟ့သုန့ၣ် မၤဂ့ၤအီၤတက့ၢ်. ဒီးပှၤလၢအမၤတရီတပါသု, ဒီးမၤအၢမၤနးသုန့ၣ်ဘါ ထုကဖၣ်န့ၢ်အဂီၢ်တက့ၢ်. ဒ်သိး သုကကဲထီၣ်လၢသု ပၢ်အိၣ်လၢမူခိၣ် အဖိခွါတဖၣ်န့ၣ်လီၤ.”—မးသဲ ၅:၄၄, ၄၅
