Jehova kwa tumbwidilire Jakopo asi nga mu popera moomu ga poperere Abirahamu naIsaka. Jakopo ta ka tunga moHarani, omu ga ka kwarerere nokukakara nepata lyenene ntani kwa kere ngawo zonene.

Makura Jehova ta tantere Jakopo asi: ‘Tengura kosirongo seni.’ Jakopo nepata lyendi tava tameke kugenda nzira zonde va tengure. Vantu vamwe tava gwanekere naJakopo monzira nokumutantera asi: ‘Mukuroge Esau kuna kuwiza novagara 400!’ Jakopo kwa tjilire asi nampo Esau na mu dipaga nepata lyendi. Ta kanderere kwaJehova asi: ‘Parura nge kwamukurwange Esau.’ Ezuva lyokukwama ko Jakopo ta tumine Esau nonzwi noyikombo nonongombe nonongameru ntani noyindongi yoyinzi.

Masiku apa Jakopo ga kere gelike ta mono muengeli! Muengeli kwa lindundanesere naJakopo, dogoro ezuva tali si. Nampili ngomu Jakopo ga remanene, age kapi ga hagekere kulindundanesa. Muengeli ta mu tantere asi: ‘Siga nge ni ze.’ Nye Jakopo ta mu tantere asi: ‘Kapi tani ku sigi dogoro o tungike nge.’

Muengeli makura ta mu tungike. Jakopo ga yi divire asi Esau kapi nga mu dipaga.

Ngurangura ozo Jakopo ta tara koure, makura ta mono Esau novagara 400. Jakopo ta piti komeho ta linyongamene komeho zamukurwendi  yikando yitano-naruvali. Esau ta dukire Jakopo nokumulidingira monsingo. Makura navenye tava lili nokutulisa po mbili. Omu ono kugazara, ngapi ga lizuvhire Jehova kuhamena monkedi omu Jakopo ga gusire po udigu owo?

Makura Esau ta tengura kembo lyendi ano Jakopo nage ta ka za. Jakopo kwa kere novana wovagara 12. Madina gawo Rubena naSimiyoni naRevhi naJuda naDana naNafitali naGada naAseli naIsasikali naSeburoni naJosefa ntani Mbenyameni. Jehova kwa ruganesere Josefa mokupopera vantu vendi. Ono diva omu ga yi rugene ndi? Ngatu ka gwana elimbururo mosirongwa sokukwama ko.