Yeova walavile Yakobo ukuti alamucingilila wakwe vino wacingiliile Abulahamu na Isaki. Yakobo waile aikala umu mpanga iya Alani, nupya amuno waile atwalila, akwata nu lupwa ulukulu ni vyuma ivingi.

Lino papisile insita Yeova wanenyile Yakobo ati: ‘Swilila uku mpanga iya kumwinu.’ Fwandi Yakobo nu ulupwa lwakwe yatandike ulendo utali uwa kuswililamo. Lino yali mu nzila antu yamwi izile iyanena Yakobo iyati: ‘Esau na onsi 400 yakwiza umu kukukomenkanya!’ Lino Yakobo uvwile vivyo welenginye ukuti Esau akwiza umu kuyazanza fwandi uvwile sana intete. Wapefile kuli Yeova ukuti: ‘Napaapata ncingilile uku mwina wane Esau.’ Lyene uwanda uwalondelilepo Yakobo watumiile Esau mawila aingi, imfwele, imbuzi, ing’ombe, ingamali na ya punda.

Uwanda kwene uwa usiku lino Yakobo wali wenga, waweni malaika! Malaika watandike ukumulwisya. Yalwisyanyizye mpaka ukufika katondo. Nanti cakuti Yakobo wacisike, atatoovwike foo. Malaika wamunenyile ati: ‘Ndeke napita.’ Lelo Yakobo wamunenyile ati: “Nsikukuta mpaka sile umpaale.”

Malaika wasusile wapaala Yakobo. Lyene Yakobo wasininkizye ukuti Yeova atalaleka Esau amucitile iviipe.

 Uwanda kwene uwa katondo Yakobo waweni Esau na onsi 400 katalamukila. Yakobo wakoleliile ulupwa lwakwe aya afukamila umwina imiku 7. Esau wasimwile aya akomenkanya Yakobo nu kumukukula. Esau na Yakobo yatandike ukulila nupya yapanzile umutende. Uzye ukwelenganya ukuti Yeova uvwile uli pali vino Yakobo wacisile lino wali ni ntazi ii?

Lyene pa cisila Esau waswilile ukwakwe, Yakobo nawe watwalilile nu ulendo wakwe. Yakobo wakweti ana aonsi 12. Amazina yao a Lubeni, Simyoni, Levi, Yuda, Dani, Nafutali, Gadi, Asyeli, Isakali, Zebuluni, Jozefu na Benjamini. Yeova waomvizye wenga pa yana yaa kulikuti Jozefu, pa kukulula antu yakwe. Uzye utumanya inzila ino wacitilemo vivyo? Leka tulole.