Jeova ear kallim̦ur ñan Jekob bwe enaaj kõjparoke ãinwõt an kar kõjparok Ebream im Aisak. Jekob ear jokwe ilo juon jikin etan Heran, ijo ear m̦are im pãlele ie. Baam̦le eo an ear lukkuun l̦ap im ear bareinwõt lukkuun m̦weiie.

Tokãlik, Jeova ear ba ñan Jekob: ‘Kwõn jepl̦aak ñan ãneo ãneem̦.’ Innem Jekob im baam̦le eo an rar jepl̦aak im etal ilo ial̦ eo aer eaetok. Tokãlik, ke rej etal ilo ial̦ eo aer, rijerbal ro an Jekob rar itok ñan ippãn im ba: ‘L̦eo jeim̦, Iso, ej itok in wõnm̦ae eok, im ewõr 400 em̦m̦aan ro ippãn!’ Jekob ear lukkuun mijak kõnke ear l̦õmn̦ak bwe Iso enaaj m̦an e im baam̦le eo an. Kõn men in, ear jar ñan Jeova im ba: ‘Jouj im lo̦mo̦o̦ren eõ jãn l̦eo jeiũ.’ Ilo raan eo tok juon, Jekob ear jilkinl̦o̦k ñan Iso elõñ jiip, koot, kamel̦, im donkey, tarrin menin lel̦o̦k ko an.

Ilo boñõn eo, ke Jekob ear make iaan, ear loe juon enjel̦! Enjel̦ in ear jino uñtaak ippãn. Erro kar uñtaak l̦o̦k im ejimmarok. Meñe Jekob ear jorrããn, ak ear jab ebbeer. Enjel̦ in ear ba ñane: ‘Kwõn kõtl̦o̦k eõ bwe in etal.’ Ak Jekob ear ba: ‘Jaab, iban kõtl̦o̦k eok m̦ae iien kwõj kajeraam̦m̦an eõ.’

Kiiõ enjel̦ in ej kab kajeraam̦m̦an Jekob, im Jekob ejel̦ã bwe Jeova eban kõtl̦o̦k an Iso m̦ane.

Ilo ejja jibboñõn eo wõt, Jekob ear reilo̦k im loe Iso im 400 em̦m̦aan ro ippãn. Kõn men in, ear tõl baam̦le eo an im rar ilo̦k in wõnm̦aiki, im ear badikdik ñan Iso 7 kõttan. Innem Iso ear ettõr im atbo̦kwõje  Jekob. Erro kar jim̦or jañũt doon im kõm̦m̦an aenõm̦m̦an. Ilo am̦ l̦õmn̦ak, ta kar eñjake eo an Jeova ke ear loe joñan an Jekob kate ñan kõm̦m̦an aenõm̦m̦an?

Tokãlik Iso ear ro̦o̦l ñan ijo jikin im Jekob ear wõnm̦aanl̦o̦k ilo ial̦ eo an. Ear wõr 12 nejin Jekob l̦addik. Etaer ej Ruben, Simeon, Livai, Juda, Dan, Naptelai, Gad, Asher, Issakar, Zebulun, Josep, im Benjamin. Jeova ear kõjerbal Josep, juon iaan l̦adik ro nejin Jekob, ñan lo̦mo̦o̦ren armej ro An. Kwõjel̦ã ke ewi wãween an kar Jeova kõjerbale? Eokwe, jenaaj etale ilo katak ko tok jet im̦aan.