Jehová ni̱ka̱ʼa̱nra ña̱ kundaara ta̱ Jacob, táki̱ʼva ke̱ʼéra xíʼin ta̱ Abrahán xíʼin ta̱ Isaac. Ta̱ Jacob ni̱xa̱a̱ra xi̱koora ñuu Harán. Kán ti̱ndaʼa̱ra, ka̱ku ku̱a̱ʼání se̱ʼera ta ku̱a̱ʼání ña̱ ku̱i̱ká xi̱kuumiíra.

Tá ni̱ya̱ʼa tiempo Jehová ni̱ka̱ʼa̱nra xíʼin ta̱ Jacob: “Ndikó ñuu nu̱ú ni̱xi̱yo yiváún”. Tasaá ke̱e ta̱ Jacob ku̱a̱ʼa̱nra xíʼin na̱ veʼera. Tá ku̱a̱ʼa̱nna, sava na̱ káchíñu nu̱ú ta̱ Jacob ni̱ka̱ʼa̱nna xíʼinra: “Va̱xi ta̱ Esaú ñaniún ta va̱xi 400 ta̱a xíʼinra”. Ni̱yi̱ʼvíní ta̱ Jacob chi nda̱kanixi̱níra ña̱ kúni̱ ta̱ Esaú kaʼnírara. Ña̱kán ni̱ka̱ʼa̱nra xíʼin Jehová: “Sakáku yi̱ʼi̱ ndaʼa̱ ñanii̱”. Inka ki̱vi̱ ta̱ Jacob chi̱ndaʼára ku̱a̱ʼání ndikachi, ti̱xúʼu, si̱ndi̱ki̱, camello xíʼin tí burro ku̱a̱ʼa̱n ndaʼa̱ ta̱ Esaú.

Mií ñu̱ú kán ta̱ Jacob xi̱nira iin ángel. Ta̱ ángel yóʼo ki̱xaʼára kánitáʼanra xíʼinra, iinsaá nda̱a̱ tá ni̱tu̱vi. Ni tu̱kue̱ʼe̱vara va̱ása nísándákoora ña̱ kanitáʼanra. Ta̱ ángel ni̱ka̱ʼa̱nra: “Taxi ná ku̱ʼi̱n”. Soo ta̱ Jacob nda̱kuiinra: “Va̱ása, va̱ása taxii̱ ku̱ʼún nda̱a̱ ná taxiún bendición ndaʼi̱”.

Tasaá ta̱xi ta̱ ángel bendición ndaʼa̱ra. Xíʼin ña̱yóʼo na̱kunda̱a̱-ini ta̱ Jacob ña̱ kǒo taxi Jehová i̱xandi̱va̱ʼa ta̱ Esaú xíʼinra.

Tá ni̱tu̱vi, ta̱ Jacob xi̱nira va̱xi ta̱ Esaú ta va̱xi 400 na̱ ta̱a xíʼinra. Siʼnaka miíra ke̱e ku̱a̱ʼa̱n nda̱kutáʼan xíʼin ta̱ Esaú, tá  ni̱xa̱a̱ra nu̱úra xi̱kuxítíra u̱xa̱ yichi̱ nu̱úra. Ta̱ Esaú kama xi̱nura ta nu̱mira ta̱ Jacob tasaá ki̱xaʼá u̱vi̱ saána xáku̱na ta nda̱saviína ku̱a̱chi ña̱ kúúmiína. ¿Á ku̱si̱í-ini Jehová xíʼin ña̱ ke̱ʼé ta̱ Jacob túviún?

Tándi̱ʼi ta̱ Esaú ndi̱kóra veʼera, ta ta̱ Jacob nda̱kundeéra ku̱a̱ʼa̱nra nu̱ú ni̱ka̱ʼa̱n Jehová xíʼinra. 12 xi̱kuu ta̱a se̱ʼe ta̱ Jacob. Na̱yóʼo xi̱nanína: Rubén, Simeón, Leví, Judá, Dan, Neftalí, Gad, Aser, Isacar, Zabulón, José xíʼin ta̱ Benjamín. Chí nu̱úka sakuaʼayó ndáa ki̱ʼva xi̱niñuʼu Jehová ta̱ José ña̱ sakákura na̱ ñuura. ¿Á kúni̱ún kunda̱a̱-iniún ndáaña ke̱ʼé Jehová? Ná kotoyó.