Jiihóvah éí Jéíkab ííłní: ‘Tʼáá Éíbraham dóó Áízak nahalingo naa áhodeeshyąął.’ Jéíkab éí kéyah Héíran hoolyéegi nizhnínáago, haʼáłchíní dóó habéeso ląʼígo hazlı̨́ı̨́ʼ.

Jiihóvah ánáádooʼniid: ‘Danizhéʼé yę́ę bikéyahgóó nídídááh.’ Jéíkab dóó bił dabighanígíí tʼáá akǫ́ǫ́ dah nídiikai. Jéíkab bił hóoneʼ: ‘Nínaaí Íísa aadę́ę́ʼ diné 400 yił nidáahjįʼ deeskai!’ Jéíkab éí Íísa yinásdzííd áádóó atídanihidoolííł jiniizı̨́ı̨́ʼ. Jiihóvah bichʼįʼ sozdoolzin: ‘Tʼáá shǫǫdí, shínaaí bitsʼąą yisdáshíłteeh.’ Biiskání Jéíkab éí dibé, tłʼízí, béégashii, ghą́ą́ʼaskʼidii, dóó télii ląʼígo éí Íísa yichʼįʼ adeiniiskaad.

Tʼáá éí bitłʼééʼ, Jéíkab tʼáá sáhí jizdáago níłchʼigo naalʼaʼí léiʼ jiiłtsą́! Éí bił ahijigą́ągo hayííłką́. Jéíkab atíjiidzaa ndi, doo tʼóó baa ázhdeetʼą́ą da. Níłchʼigo naalʼaʼí yę́ę áháłní: ‘Shidíchííd.’ Ndi Jéíkab éí ábijiní: ‘Shikʼijiisínídliʼgo índa nidideeshchił.’

Níłchʼigo naalʼaʼí yę́ę Jéíkab yikʼijisdliʼ. Jéíkab éí Jiihóvah baa áhályą́ą doogo bił bééhoozin áádóó Íísa doo atíbidoolíił da.

Jéíkab hajííghalgo, Íísa aadę́ę́ʼ diné 400go yił yinééł. Jéíkab éí oonéłígíí tʼáá sáhí bidáahjįʼ dashdiiyá áádóó hánaaí tsostsʼidi  bichʼįʼ yaa ájiidzaa. Íísa hadááh yílwodgo hazénázhchid. Áko tʼáá ájíłah jichago kʼé náʼahizhdooʼniid. Tʼáá átʼéé ńtʼééʼ Jéíkab ádzaa yę́ę, haitʼéego Jiihóvah yaa tsídeezkééz?

Íísa bighangóó anáádzá, Jéíkab ałdóʼ tʼáá bí bighangóó anáádzá. Jéíkab éí 12go biyeʼké hazlı̨́ı̨́ʼ. Éí Rúben, Símiyan, Líívai, Júdah, Dan, Náftalai, Géed, Ásher, Ísakar, Zébyulan, Jóseph, dóó Bénjamin daolyé. Jóseph wolyéhígíí éí náasdi Jiihóvah bidineʼé yisdéidoonił. Éí haitʼéego diné yisdájíínil? Ííshją́ą́ shı̨́ı̨́ nihił bééhodoozįįł.