Jehová Diosca Abrahanda, Isaacta imashina cuidashcashnallatami Jacobtapash cuidasha nishca carca. Jacobca Harán llactapimi causangapaj quedashcarca. Chaipi cazarashpami tauca huahuacunata charirca, charij charijpash tucurca.

Tiempo yalijpica Jehová Diosca Jacobtaca nircami: ‘Canba taitacuna causanajuj llactaman tigrailla’ nishpa. Shinami Jacobca paipa familiandi chai llactaman ri callarirca. Shina rinajujpimi paita sirvij runacuna shamushpaca cashna nirca: ‘Esaú runami canda tuparingapaj shamujun. Paihuanga, chuscu patsaj runacunapashmi shamunajun’ nishpa. Shina nijpimi Jacobca paitapash, paipa familiatapash Esaú llaquichinga yashpa ninanda manllarirca. Chaimi Jehovata cashna mañarca: “Cunanga ñuca huauqui Esaupa maquimanda cacharichihuayari” nishpa. Cayandi punllaca Jacobca ashtaca llamacunata, chivocunata, huagracunata, camellocunata, burrocunatapash Esauman carachunmi cacharca.

Chai tuta Jacob pailla quedashpami shuj angelta ricurca. Chai angelca Jacobhuanmi punllayangacaman macanajujurca. Jacob janga quedashpapash na shaijushpami macanajushpa catirca. Chaimi chai angelca nirca: “Saquihuai punllayamunmari” nishpa. Shinapash Jacobca nircami: “Ñucata na bendiciajpica candaca na cacharishachu” nishpa.

Chaimi chai angelca Jacobtaca bendiciarca. Shinami Jacobca cuenta japirca paipa huauqui ama llaquichichun Jehová Dios cuidana cashcata.

Chai punllaca ‘Jacob vichai ricushpaca, chuscu patsaj runacunandi Esaú shamujujtami ricurca’. Chaimi paipa familiata ñaupashpa Esauta tuparingapaj rirca. Esaú runagupaman chayashpaca 7 viajecamanmi urai cumurirca. ‘Esaupash tuparingapaj calpashpami, Jacobta ugllashpa ishcandi huacanajurca’. Shinami  paicunaca ali tucurca. ¿Imatata yuyangui Jacob shina rurashcataca Jehová Diosca alicachircachu?

Chai jipaca Esaú runaguca paipa huasimanmi tigrarca. Cutin Jacobca paipa taitapa llactamanmi rishpa catirca. Jacobca 12 churicunatami charirca. Paicunaca: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjamín shuticunami carca. Huatacuna jipaca Jehová Diosca Jacobpa churi Joseta utilizashpami paipa llactata salvagrijurca. ¿Imashina salvashcata yachangapaj munanguichu?