O Jehova obećindža e Jakovese so ka zaštitini lje isto sar so zaštitindža e Avrahame hem e Isake. O Jakov dželo te živini ko jekh than kova vičindža pe Haran, uduri ženindža pe, hine lje bari porodica hem ulo but barvalo.

Jekh dive, o Jehova phendža e Jakovese: „Irin tut ki tiklji phuv.“ Tegani, o Jakov hem oljesi porodica podžindže ko baro drumo. Dži hine pana ko drumo, disave manuša phendže e Jakovese: „To phral, o Isav, avela akari hem oljeja isi 400 manuša!“ O Jakov darandilo so o Isav ka čerel diso lošno oljese hem oljese porodicače. Ov molindža pe e Jehovase: „Molinava tut, spasin man ando mo phral.“ Tajsato dive, o Jakov bičhaldža e Isavese ko poklon but bakre, buznja, gurumnja, kamile hem hera.

Odija rat, ked o Jakov hine kokri, dikhlja jekhe anđele! Odova anđeo počmindža te borini pe oljeja. On borindže pe dži sabalje! Iako o Jakov hine povredimo, na čhinavdža te borini pe. O anđeo phendža: „Mukh man.“ Ama, o Jakov phendža ljese: „Na ka mukhav tut sa dži na blagoslovineja man.“

Tegani o anđeo blagoslovindža lje. Adžahar, o Jakov džandža so o Jehova na ka mukhel o Isav te čerel ljese diso lošno.

 Odova dive, sabalje, o Jakov dikhlja dural sar avela o Isav zajedno pe 400 manušencar. Ov dželo anglji pi porodica, hem efta putija poklonindža pe anglo po phral. O Isav prastandilo dži ko Jakov hem doljindža lje ki angalja. Tegani, o solduj rundže hem pomirisalje. So mislineja, sar hine e Jehovase ked dikhlja kobor šukar postupindža o Jakov ki akija situacija?

Palo odova, o Isav irindža pe čhere, a o Jakov produžindža poklo drumo. O Jakov hine lje 12 murša. Oljenge nava hine Ruvim, Simeon, Levije, Juda, Dan, Neftalim, Gad, Asir, Isahar, Zavulon, Josif hem Venijamin. Palo odova, o Jehova prekalo Josif spasindža pe narodo. Da li džaneja sar? Hajde te dikha.