Yehowa balayile Yakobo shi akyebe kumukalwila nka bibaadi mukalwile Abrahame na Isaake. Yakobo bakashaleele pa mbalo yabetamina bu Harane, kubaadi mwibakile bakashi, afika kifuko kikata na bupeta bwibungi.

Kunyima kwa mafuku, Yehowa nkulungula Yakobo shi: ‘Alukiila kwiumbo dya bamashoobe.’ Yakobo na kifuko kyaye nkubanga lwendo lula bwa kwalukiila. Mwishinda, bangi bantu nkubanga kulungula Yakobo shi: ‘Mukwenu Esau kwete kufika na bantu 400!’ Yakobo bapushishe moo shi Esau afiki mu kumulwisha ngoshi na kifuko kyaye. Aye nkuteka Yehowa shi: ‘Nakusendeela mpaashe namu kwiyaasa dya mukwetu.’ Efuku dibalondele, Yakobo nkutumina Esau mikooko, mbushi, ngombe ikashi, tumeelo na mpunda.

Bwabwa bufuku pabaadi Yakobo bupenka, bamwene mwikeyilu! Mwikeyilu nkubanga kulwa na Yakobo. Abo nkulwa mpa na ku nkyelo. Sunga byekala shi Yakobo baadi mukalakashwe bikata, tabakookyele nya. Mwikeyilu nkumulungula shi: ‘Ndekye nyende.’ Kadi Yakobo namu shi: ‘Nta nkulekye su twe musampe.’

Ku nfudiilo a byoso, mwikeyilu nkusampa Yakobo. Binobino Yakobo nkushinguula shi Yehowa taatadiila Esau bwa kumulwisha ngoshi nya.

 Yawa namashika, Yakobo nkwibwesha meeso, aye nkumona Esau ku bula na bantu 400. Yakobo nkwenda na kifuko kyaye abo nkukunama kumpala kwa mukwabo misango musambobidi. Esau nkusuuka lubilo mufungule maboko aaye bwa kumukuukila. Bubidi bwabo nkubanga kudila na kwalusha butaale. Yehowa bapushiishe naminyi mu kipaso kibaadi Yakobo mupudishe uno mwanda?

Kunyima, Esau baalukiile kwaye, Yakobo namu nkwalukiila kwaye. Yakobo baadi na bana 12. Mashina aabo abaadi: Ruben, Simeon, Leevi, Yuuda, Dane, Neftalii, Gade, Ashere, Isakare, Zabulone, Yoosefe, na Benyamine. Yosefe ngumune a ku baaba bana, Yehowa baadi mumufubishe bwa kupaasha mwilo Waye. Ouku bibaadi mumufubishe su? Tubande kutala.