Yehuwa nẹ̌diandi si Yakub i Sie sarung měndiagạ si Yakub, kere i Sie něndiagạ si Abraham dingangi Ishak. Yakub mětẹ̌tanạ su Haran. Sene i sie nẹ̌kawing, kụ kěluargane nakoạ mal᷊awọ. I sie lai nakoạ sěbạe makalạ.

Bọu ene Yehuwa nẹ̌bera si Yakub, ’Pẹ̌bal᷊ịe sarang banuanu.’ Hakị u ene, i Yakub dingangu kěluargane nẹ̌bal᷊ị sarang banuang i sire. Su ral᷊eng, pirang katau ělang i Yakub něhabarẹ̌, ’I Esau, kakạu, seng su ral᷊eng sarang ini dingangu 400 taumata!’ Yakub matakụ i Esau sarung měkoạ barang dal᷊akị si sie dingangu kěluargane. I sie nẹ̌doa si Yehuwa, ’Tul᷊ungko tadeạu iạ masal᷊amatẹ̌ bọu i kakạku.’ Dịěllone, Yakub něndoho lawọ hadiah si Esau. Ene kai domba, kambing, sapi, unta, dingangu keledai.

Su hěbi ene, su tempong i Yakub kětạeng sẹ̌sane, i sie nakasilo piạ malaekatẹ̌! Bọu ene, malaekatẹ̌ ene nẹ̌gulatẹ̌ dingange. I rẹ̌dua nẹ̌gulatẹ̌ sarang mal᷊ukadẹ̌. Maning i Yakub natědụ, i sie tawe něngědo. Malaekatẹ̌ ene naul᷊ị, ’Pělọko iạ.’ Katewe i Yakub naul᷊ị, ’Al᷊amateko iạ kal᷊imona, buhudeng iạ měmělo si kau.’

Samurine, malaekatẹ̌ ene něngal᷊amatẹ̌ si Yakub. I Yakub nakasingkạ Yehuwa tawe měmala i Esau měkoạ barang dal᷊akị si sie.

 Dịěllone mal᷊ukadẹ̌, bọu marau Yakub nakasilo si Esau dingangu 400 taumata. I Yakub dimal᷊eng kal᷊imona bọu kěluargane kụ kimakurung pitung sul᷊ẹ su těngong i kakạe. Esau timal᷊ang sarang i Yakub kụ nělahěkụ si sie. I rẹ̌dua tahatuari ene simangị dingangu nẹ̌dame. Tumuhụ si kau, kerea pěndang i Yehuwa nakasilo apa nikoạ i Yakub?

Bọu ene i Esau napul᷊ẹ, kụ i Yakub něnurusẹ̌ daral᷊engange. Yakub piạ anạe esẹ 12 su kataune. Areng i sire i Ruben, Simeon, Lewi, Yehuda, Dan, Naftali, Gad, Asyer, Isakhar, Zebulon, Yusuf, dingangi Benyamin. Yehuwa něpakẹ sěngkatau bọu i sire, ene kai i Yusuf, gunang měnal᷊amatẹ̌ manga ělang’E. Apa i kau masingkạ kerea carane? Bọete i kitẹ mědeạ sasimbahe.