Yehova wangulayizga Yakobe kuti wamuvikiliyengi nge mo wanguchitiya ndi Abrahamu kweniso Yisaki. Yakobe wajanga ku Harani, we kweniko wanguto. Iyu wenga ndi banja likulu ndipuso wangukhupuka.

Pavuli paki, Yehova wangukambiya Yakobe kuti: ‘Uwere kucharu chaku.’ Mwaviyo, Yakobe wanguto banja laki ndipu wangwamba ulendu utali wakuwere kwaki. Ŵe munthowa, ŵanthu anyaki angukambiya Yakobe kuti: ‘Esau muku waku watuza, iyu we ndi anthurumi 400!’ Yakobe wanguchita mantha chifukwa waŵanaŵananga kuti Esau wamubayengi pamoza ndi banja laki. Iyu wangupemphera kwaku Yehova kuti: ‘Chondi nditaskeni ku muku wangu.’ Mulenji waki Yakobe wangutumiza mphasu zinandi kwaku Esau nge mbereri, mbuzi, ng’ombi, ngamila ndi abulu.

Usiku wa zuŵa lenili nyengu yinyaki Yakobe wenga yija ndipu wanguwona mungelu. Mungelu wangwamba kulimbana ndi Yakobe. Yiwu angulimbana mpaka mulenji. Chinanga kuti Yakobe wangupwetekeka, wanguthera cha. Mungelu yo wangukamba kuti: ‘Ndileki ndikengi.’ Yakobe wangumuka kuti: ‘Awa, ndikulekengi cha unditumbiki dankha.’

Pakumaliya, mungelu yo wangutumbika Yakobe. Sonu Yakobe wanguziŵa kuti Yehova wamuvikiliyengi kuti Esau waleki kumupweteka.

Kwati kwacha ndi mulenji, Yakobe wati waleresa patali wanguwona Esau wachiza ndi anthurumi 400. Yakobe wanguluta panthazi pa banja laki ndipu wangugwada ndi kukotamiya muku waki Esau maulendu 7. Esau wangutchimbiriya kwaku Yakobe ndipu wangumuvumbatiya. Wosi  ŵaŵi angwamba kuliya ndipu anguyanjana so. Uwona kuti Yehova wanguvwa wuli pa vo Yakobe wanguchita kuti wayanjani so ndi muku waki?

Pavuli paki, Esau wanguwere ko wajanga ndipu Yakobe wangulutiriza ulendu waki. Yakobe wenga ndi ŵana anthurumi 12. Mazina ngawu ngenga yanga: Rubene, Simeoni, Levi, Yuda, Dani, Naftali, Gadi, Ashere, Isakara, Zebuluni, Yosefe ndi Benjamini. Yehova wangugwirisiya ntchitu Yosefe yo wenga yimoza mwa ŵana ŵenaŵa, kuti wataski ŵanthu Ŵaki. Kumbi uziŵa mo wangumugwirisiya ntchitu? Tiyi tiwoni.