Yahwe akaraganiza Yakobo ngu akaba n’agenda kumulinda atahikwaho akabi nk’oku yalinzire Iburahimu na Isaka. Yakobo akatandika kwikara omu kiikaro ekirukwetwa Harani, nambere yatungire omukazi, eka enkooto, kandi yafooka muguuda.

Obwire bukahika Yahwe yagambira Yakobo ati: ‘Garuka omu nsi y’owanyu.’ Nahabweki Yakobo n’eka ye bakatandika orugendo oruraihire muno orw’okugaruka ow’abu. Obu bakaba nibagenda, abantu abamu bakaija bamugambira ngu: ‘Mugenzi wawe Esau aliyo naija kukutangaana, kandi ali n’abasaija 400!’ Yakobo akatiina muno habwokuba akatekereza ngu Esau akaba n’agonza kumukora kubi uwe hamu n’eka ye. Akasaba Yahwe n’agamba ati: ‘Ninkwesengereza onjune mugenzi wange.’ Ekiro ekyahondiireho, Yakobo akasindikira mugenzi we Esau ebisoro bingi, entaama, embuzi, ente, engamira, hamu n’enkaina nk’ebisembo.

Itumbi eri, Yakobo obwakaba ali wenka, akarora maraika kandi maraika onu akatandika kumurwanisa, barwana kuhika nyenkyakara. Yakobo n’obwaraaba yahutaire, ataleke kumurwanisa. Maraika akamugambira ati: ‘Ndeka ngende.’ Yakobo nauwe yamugarukamu ati: ‘Nangwa, tindukwija kukuleka kuhikya ompaire omugisa.’

Maraika akamalirra amuhaire omugisa. Obu nubwo Yakobo yakyetegeriize ngu Yahwe akaba atarukugenda kwikiriza Esau kumukora kubi.

 Obwire obu bwakiire, Yakobo akalengera Esau aliyo naija, aine abasaija 400. Yakobo akebembera eka ye yagenda yainama omu maiso ga mugenzi we emirundi musanju. Esau akairuka y’aija hali Yakobo yamugwa omu munda. Bakatandika kurra hanyuma bagarraho obusinge hagati yabo. Notekereza Yahwe akehurra ata obu yarozere omulingo Yakobo yakwasiremu ensonga egi?

Obwire bukahika Esau yagaruka omu maka ge, kandi Yakobo yayeyongerayo n’orugendo rwe. Yakobo akaba aine abaana aboojo 12. Ganu nugo amabara gabo: Reubeni, Simeoni, Levi, Yuda, Dani, Nafutali, Gadi, Asere, Isakara, Zeburuni, Yusufu, hamu na Benyamini. Yahwe akakozesa Yusufu, omu ha batabani ba Yakobo kujuna abantu be. Omanyire omulingo yakikozeremu? Katurole.