Иегова Иаковту, Авраам биле Исаакты ышкаш, камгалаарын аазаан. Иаков Харран хоорайга чурттап турган. Ол аңаа өгленип алгаш, хөй ажы-төлдүг болгаш бай апарган.

Иегова Иаковка мынча дээн: «Чуртуңче дедир чана бер». Ынчангаш Иаков өг-бүлезин эдертип алгаш, ырак орукче үнүпкен. Орук ара улус аңаа: «Исав акың 400 эр кижи эдертип алган сенче уткуштур кел чыдыр!» — дээн. Исав аңаа болгаш ооң өг-бүлезинге хора чедирипсе канчаарыл дээш, Иаков коргуп эгелээн. Ол Иеговадан дилээн: «Акымдан мени камгалап көрем!» Дараазында хүн Иаков Исавче эңмежок хөй инек, теве, хой, өшкү, элчиген белекке чоргузупкан.

Ол дүне Иаков чааскаан тургаш, ангелди көрүп каан! Ол ангел Иаков-биле хүрежип эгелээн. Олар даң аткыжеге чедир хүрешкен. Безин Иаков кемдей берген. Ынчалза-даа ол дүжүп бербээн. Ангел аңаа: «Мени салып көрем» — дээн. Иаков: «Мени йөрээвээн шааңда салбас мен» — деп чугаалаан.

Ынчан ангел Иаковту йөрээп каан. Иаков ам акызы Исав аңаа хора чедирбес кылдыр, Иегова дузалаар деп билип каан.

Иаков даң бажында уткуштур кел чыдар Исав биле 400 кижини көрүп каан. Иаков өг-бүлезин дуй турупкаш, акызының мурнунга  чеди катап мөгейген. Исав олче халып келгеш, ону куспактаптарга, ийилээ ыглажы бергеннер. Оон алышкылар эптежип алган. Иаковтуң берге байдалда ынчаар алдынганы Иегованың сеткилинге кирген бе, чүү деп бодаар сен?

Исав дедир бажыңынче чана берген, а Иаков оруун уламчылаан. Иаков 12 оолдуг турган. Оларның аттарын Рувим, Симеон, Левий, Иуда, Дан, Неффалим, Гад, Асир, Иссахар, Завулон, Иосиф база Вениамин дээр. Оларның бирээзин, Иосифти, ажыглап, Иегова чонун камгалаан. Канчаар? Ону ам билип аалам.