Te Jehová la yalbey ta jamal te Jacob te ya skanantaye, jich bitʼil la spas ta stojol te Abraham sok te Isaac. Te Jacob jil ta nainel ta jpam kʼinal te Harán sbiile. Tey nujpun-a, la sta bayal yal snichʼnab sok la sta skʼulejal.

Ta patil bael, te Jehová la yalbey te Jacob: “Sujtan bael ta slumal te ameʼ atate”. Jich yuʼun te Jacob sok te sfamilia kajik ta najtʼil beel. Kʼalal yakik ta beel-ae, chaʼoxtul j-abatetik yuʼun tal yalbeyik te Jacob: “Te abankil Esaú yak ta talel ta jtojoltik sok 400 ta tul swiniktak”. Te Jacob xiw ta skaj te ayniwan ya yichʼ utsʼinel sok te sfamiliae. Jaʼ yuʼun jich la skʼopon te Jehová: “Awokoluk, koltayawon ta skʼab te jbankil Esaú”. Ta yan kʼajkʼal, te Jacob la stikunbey bael majtʼanil te Esaú, bayal ta kojt tuminchijetik, tentsunetik, wakaxetik, kameyoetik sok burroetik.

Ta ajkʼabal-abi, kʼalal stukel-a te Jacob, la yil jtul chʼul-abat. Te chʼul-abat kaj stsak sba sok te Jacob kʼalalto ta sakubel kʼinal. Manchukme te Jacob ejchʼenaj maba la yijkʼitay te chʼul-abate. Te chʼul-abat jich la yalbey: “Ijkʼitayawon”. Pero te Jacob jich la sutbey: “Maʼuk, jaʼto teme la awakʼbon bendision”.

Ta slajibal, te chʼul-abat la yakʼbey bendision te Jacob. Jich yuʼun te Jacob snaʼojix-a te maba ya yakʼ Jehová te ya x-utsʼinot yuʼun te Esaú.

 Ta sakubel kʼinal-abi, te Jacob la yil ta namal te yak ta talel te Esaú sok te 400 ta tul swiniktake. Te Jacob jaʼ nail lokʼ ta stael te Esaú ta patil kʼot te sfamilia, kʼalal la sta sba sok te sbankil la snijan sba jukeb buelta ta stojol. Te Esaú animal bajtʼ ta stojol te Jacob sok la spet. Ochik ta okʼel ta schebalik sok la schajpanik te kʼop jajchem yuʼunike. ¿Yabal akuy te la smulan Jehová te bin la spas te Jacobe?

Ta patil-abi, te Esaú sujt bael ta sna, yan te Jacob chaʼochxan ta namal beel. Te Jacob 12 ta tul snichʼnab. Jaʼ te Rubén, Simeón, Leví, Judá, Dan, Neftalí, Gad, Aser, Isacar, Zabulón, José sok te Benjamín. Ta patil bael, te Jehová la skoltay te lum yuʼun ta swenta te José, te jaʼnix snichʼan te Jacobe. ¿Yabal akʼan ya anaʼ bin-utʼil? Ya kiltik.