Yehova aahimuleiherya Yakobe wira aarowa omukhaliherya, ntoko aamukhalihenrye awe Abrahamu ni Isakhi. Yakobe aakhala muttetthe wa oHarani, weiwo aathenle awe, khukhalana emusi yuulupale ni mihakhu sinceene.

Nihiku nimosa Yehova aahimuleela Yakobe wira: ‘Muhokolowele elapo eyariwe anyu’. Nto Yakobe ni emusi awe yaahipacerya mukwaha aya woorakama. Mphironi, arumeyi a Yakobe yaahirwa omuleela wira: ‘Muulupale anyu Esawu onnoorwa ni atthu 400’. Yakobe aahoova vanceene maana uupuwela wira Esawu aaphavela omwiiva vamosa ni emusi awe. Owo aahinvekela Yehova ohimyaka so: ‘Kihoovarelani metto mukoopole wira muulupale aka ohikiirihe etthu yootakhala’. Mmeeloni mwaya, Yakobe aahithanla ipwittipwitthi, ipuri, abuuru, ikamelo ni ikhavalo, aahaavahererya arumeyi awe wira yanvahe Esawu.

Ohiyu ene yoole vaavo Yakobe aari awe mekhawe, aahiweha nlaikha. Nlaikha nlo naahipacerya owana ni yena. Awo yaahiwana mpakha oxa. Nnaamwi Yakobe aatuthunya, aahithipelela owana. Nlaikha nlo naahimuleela so: ‘Mukihiye kirooweke’. Masi Yakobe aahaakhula wira: ‘Nkinoohiyani muhinatthi okireeliha’.

Nuumala-vo, nlaikha nle naahimureeliha Yakobe. Vano Yakobe aahisuwela wira Yehova khaarowa omweemererya Esawu omwiiriha etthu yootakhala.

 Voosiisu ene yoole, Yakobe aahinweha Esawu orwaaka ni atthu 400. Yakobe aahaahoolela atthu a etthoko awe ni aahuurama ikwaha 7. Esawu ohooliwaka ni anakhotto awe aahimutthimakela Yakobe. Alopwana ale anli, mutthu ni munnawe, yaahipacerya wiiwanana. Munoonela sai, niireke Yehova aahihakalala ni ele Yakobe aapanke awe okathi ole?

Nuumala-vo, Esawu aahitthikela owannyawe, nave Yakobe aahivikaniha mukwaha awe. Yakobe aarina anamwane 12 axilopwana. Masina aya taala: Rubeni, Simeyoni, Levi, Yuda, Dani, Nefetali, Gadi, Axeri, Isakari, Zabuloni, Yosefe, ni Beniyamini. Mmosa a anamwane awo, Yosefe aahirumeeliwa ni Yehova wira owoopole atthu awe. Nyuwo munnisuwela moota eyo yaakhumelenle aya? Nrowe niwehe.