Hi Jehova nagsaad kan Jacob nga Iya puproteksyonan hiya pariho han Iya ginbuhat kanda Abraham ngan Isaac. Hi Jacob nag-ukoy ha Haran, diin hiya nakaasawa, nagkaada daku nga pamilya, ngan nagriko gud.

Ha urhi, hi Jehova nagsiring kan Jacob: ‘Balik ha imo tuna nga natawohan.’ Salit hiya ngan an iya pamilya nagtikang ha ira hirayo nga biyahe. Ha dalan, may mga nagsumat kan Jacob: ‘Tiabot an imo bugto nga hi Esau, ngan may upod hiya nga 400 nga kalalakin-an!’ Nahadlok hi Jacob kay bangin buhatan hira ni Esau hin maraot. Nag-ampo hiya kan Jehova: ‘Alayon talwasa ako tikang ha akon bugto.’ Kinabuwasan, nagpadara hi Jacob hin regalo kan Esau nga damu nga karnero, kanding, baka, kamelyo, ngan asno.

Pagkagab-i han nag-uusahan hi Jacob, nakakita hiya hin anghel! Nakigdulong ito ha iya. Nagdulong hira tubtob ha aga. Bisan kon nasakitan hi Jacob, waray hiya sumurender. Nagsiring an anghel: ‘Bul-iwi ako.’ Pero nagsiring hi Jacob: ‘Diri ko ikaw bubul-iwan kon diri mo ako bendisyonan.’

Ha urhi, ginbendisyonan han anghel hi Jacob. Yana, maaram na hi Jacob nga diri tutugotan ni Jehova nga buhatan hiya ni Esau hin maraot.

 Hito nga aga, pagkita ni Jacob ha hirayo, nakita niya hi Esau upod an 400 nga kalalakin-an. Nag-una hi Jacob ha iya pamilya ngan yinukbo ha iya bugto hin pito ka beses. Dinalagan hi Esau tikadto kan Jacob ngan ginhangkopan hiya. Nagtangis hira ngan nakigmurayaw ha usa kag usa. Ano daw la an inabat ni Jehova ha paagi han pagsulbad ni Jacob hini nga sitwasyon?

Katapos, inuli hi Esau, ngan hi Jacob nagpadayon pagbiyahe. Hi Jacob may 12 nga anak nga lalaki​—hira Ruben, Simeon, Levi, Juda, Dan, Neptali, Gad, Aser, Isacar, Sebulon, Jose, ngan Benjamin. Usa ha ira​—hi Jose—​an gin-gamit ni Jehova ha pagtalwas ha Iya katawohan. Maaram ka ba kon paonan-o? Kitaon naton.