Jéeobaeʼ tu yaʼalaj tiʼ Jacob yaan u kanáantik jeʼex tu beetil yéetel Abrahán bey xan yéetel Isaakeʼ. Jacobeʼ pʼáat kajtal tu kaajil Harán. Tiʼ tsʼoʼok u beeliʼ, anchaj yaʼab u paalaloʼob yéetel jach ayikʼalchaji.

Ka máan kʼiineʼ Jéeobaeʼ tu yaʼalaj tiʼ Jacob: ‹Suunen teʼ tuʼux yaan a papá yéetel a maamaoʼ›. Bey túunoʼ, Jacob yéetel u láakʼtsiloʼobeʼ joʼopʼ u binoʼob. Teʼ bejoʼ, jujuntúul máakoʼobeʼ tu yaʼaloʼobtiʼ: ‹A sukuʼun Esaueʼ táan u taal yéetel 400 u túulal máakoʼob›. Jacobeʼ sajak u beetaʼal loob tiʼ letiʼ bey xan tiʼ u familia tumen Esaú. Le oʼolaleʼ tu yaʼalaj tiʼ Jéeoba: ‹Salvarten tiʼ in sukuʼun Esaú›. Ka sáaschajeʼ Jacobeʼ tu túuxtaj tiʼ Esaú yaʼab tamanoʼob, chivoʼob, wakaxoʼob, camelloʼob yéetel burroʼob.

Teʼ áakʼaboʼ, le ka pʼáat tu juunal Jacobeʼ, tu yilaj juntúul ángel. Le angeloʼ joʼopʼ u baʼateʼel tu yéetel tak le táan u taal u sáastaloʼ. Kex loobiltaʼan kaʼach Jacobeʼ, maʼ tu chaʼaj u bin le angeloʼ, le oʼolal le angeloʼ tu yaʼalajtiʼ: ‹Chaʼa in bin›. Chéen baʼaleʼ Jacobeʼ tu yaʼalajtiʼ: ‹Maʼ ken in chaʼa a bin hasta a bendecirkeneʼ›.

Ka tsʼoʼokeʼ le angeloʼ tu bendecirtaj Jacob. Beoraaʼ Jacobeʼ u yojleʼ Jéeobaeʼ maʼ ken u chaʼa u beetaʼal loob tiʼ tumen Esaú.

Tu jaʼatskabil le kʼiin jeʼeloʼ, Jacobeʼ tu líiʼsaj u paakateʼ, ka tu yilaj táan u taal Esaú yéetel 400 u túulal máakoʼob. Letiʼ túuneʼ jóokʼ táanil tiʼ u familia utiaʼal u yilik Esaú. Le ka náatsʼ yiknaleʼ siete u  téenel chinlaj tu táan. Esaueʼ bin áalkabil yiknal Jacobeʼ ka tu méekʼaj. Ka túun joʼopʼ u sen okʼoloʼob. Bey túun káajik u kaʼa biskubaʼoboʼ. A tuklikeʼ, ¿maʼalob wa tu yilil Jéeoba le baʼax tu beetaj Jacoboʼ?

Le ka tsʼoʼokeʼ Esaueʼ suunaj tu yotoch, chéen baʼaleʼ Jacobeʼ seguernaj u viajar. Jacobeʼ yanchaj 12 u xiibil paalal. U kʼaabaʼobeʼ Rubén, Simeón, Leví, Judá, Dan, Neftalí, Gad, Aser, Isacar, Zabulón, José yéetel Benjamín. Ka máan kʼiineʼ Jéeobaeʼ tu salvartaj u kaajal yéetel u yáantaj José, juntúul tiʼ u paalal Jacob. ¿A kʼáat wa a wojéelt bix tu beetil? Koʼox ilik.