Joseajj Jacobun sullka wawanakapat maynïrïnwa. Tatapan wali munatänwa. ¿Kunjamsa jilanakapajj uñjapjjpachäna? Wal envidiasipjjäna, uñisipjjarakïnwa. Mä kutejj Joseajj mayja samkasïna, uk jilanakapar awistʼäna. Uka samkarjamajja jilanakapajj José nayraqatanwa jutïrin altʼasipjjañapäna. Ukatwa jukʼamp uñisipjjäna.

Mä urojja, Josean jilanakapajj Siquem marka jakʼanwa ovejanak awatisipkäna. Ukhaw jilanakapar uñjaniñapatakejj Josear Jacobojj khitäna. Jilanakapajj Josear jutaskir uñjasajj akham sapjjänwa: ‘Khayajjay samkasirejja, jutaskiwa, ¡jiwayapjjañäni!’ sasa. Katuntasajj mä pʼiyaruw jaqontapjjäna. Judá sat jilapajj akham sänwa: ‘Jan jiwayapjjamti, antisas esclavot aljapjjañäni’ sasa. Ukatwa 20 qollqe metalarojj Madián markankir alakip jaqenakar aljapjjäna. Jupanakajj Egipto markaruw sarasipkäna.

Ukatsti mä cabran wilaparuw Josean isip chillsupjjäna. Tatapan ukaruw uk apapjjarakïna, akham sasa: ‘¿Janit aka isejj wawamankki?’ sasa. Tatapajj ‘mä salvaje animalaw wawajar manqʼantpacha’ sasaw säna. Walpun jachäna, janirakiw khitis chuymachtʼirjamäkänti.

Alakip jaqenakajj Egiptor puripjjäna ukhajja, Potifar sat wali uñtʼat oficialaruw Josearojj esclavot aljapjjäna. Jehová Diosajj Joseampïskänwa. Joseajj wali trabajtʼiri confiykañ waynänwa. Ukatwa Potifarajj taqe kunanakatï jupan utjkäna ukanakjja Josean cargopar jaytjjäna.

Joseajj wali chʼamani suma uñnaqtʼani waynänwa, ukatwa Potifaran warmipajj jupamp ikintasiñatakejj Josear walja kuti arjjayäna. ¿Joseajj kamachänsa? Janiw munkänti, akham sirïnwa: ‘Janiwa,  uk lurañajj janiw walïkiti. Patronajajj nayar wal confiyitu. Jumasti esposaparakïtawa. Jumampi ikintirista ukhajj Dios contraw juchachasirista’ sasa.

Mä kutejja Potifaran warmipajj jupamp ikintasiñapatakiw Josear obligañ munäna. Isipatwa katuntäna, ukhamïpanjja Joseajj tʼijsuwayjjänwa. Potifarajj utar kuttʼanjjäna ukhajja, ‘Joseaw nayampi ikintasiñ muni’ sasaw uka warmejj kʼarisïna. Potifarajj wal colerasïna, ukatwa Josearojj carcelar llawintayäna. Ukampis Jehová Diosajj janiw Joseat armaskänti.