Saro si Jose sa mga nguhod na aki ni Jacob. Nahiling kan mga matuang tugang ni Jose na siya an paborito kan saindang ama. Ano daw an namatian ninda dahil diyan? Nauri sinda saka naanggot ki Jose. Kan nagkaigwa si Jose nin pambihirang mga pangaturugan, inistorya niya iyan sa mga tugang niya. Inisip ninda na an kahulugan kan mga pangaturugan niya iyo na sarong aldaw maruluhod sinda sa saiya. Kaya lalo pa sindang naanggot * saiya!

Sarong aldaw, nagpapastor nin mga karnero an mga tugang ni Jose harani sa siyudad nin Sekem. Sinugo ni Jacob si Jose na aramon an kamugtakan ninda. Harayo pa nahiling na ninda si Jose, tapos nag-urulay-ulay sinda: ‘Uya na su nangangaturugan. Gadanon ta siya!’ Pinurugol ninda siya asin hinulog sa hararom na kalot. Pero nagsabi an tugang nindang si Juda: ‘Dai nindo siya paggadanon! Ipabakal ta na lang bilang uripon.’ Kaya ipinabakal ninda si Jose sa halagang 20 pidaso nin pirak sa mga negosyanteng Midianita na pa-Ehipto.

Pagkatapos, ibinuntog kan mga tugang ni Jose an bado niya sa dugo nin kanding, dangan dinara iyan sa ama ninda, asin nagsabi: ‘Bakong ini su bado ni Jose?’ Kaya paghuna ni Jacob ginadan si Jose nin layas na hayop. Munduon siya, mayong makahali kaini.

Sa Ehipto, ipinabakal si Jose bilang uripon ki Potifar, sarong opisyal na halangkaw an ranggo. Pero tinabangan ni Jehova si Jose. Nahiling ni Potifar na mahusay magtrabaho si Jose saka mapagkakatiwalaan. Dai nahaloy ipinagkatiwala ki Jose an gabos na pagsadiri ni Potifar.

Nahiling kan agom ni Potifar na guwapo saka maskulado si Jose.  Aroaldaw niyang inaakit si Jose na makidurog sa saiya. Ano an gigibuhon ni Jose? Nagsayuma siya asin nagsabi: ‘Dai! Sala iyan. Pinagkakatiwalaan ako kan amo ko, asin agom ka niya. Kun makikidurog ako saimo, magkakasala ako sa Diyos!’

Sarong aldaw pinirit kan agom ni Potifar si Jose na makidurog sa saiya. Binutong siya kaini sa bado, pero nagdulag siya. Pag-abot ni Potifar, sinabi kan agom niya na gusto daa siyang lupigan ni Jose. Dai siya nagsabi nin totoo. Angguton si Potifar kaya ipinapreso niya si Jose. Pero dai siya pinabayaan ni Jehova.