ISAMBILILO 14
Umusha Uwaumfwilile Lesa
Yosefe ali pa bana abaice abo Yakobo akwete. Abakalamba bakwe abaume balimwene ukuti Yosefe e o wishi atemenwe sana pa bana bonse. Bushe ulemona ukuti baleumfwa shani ifi bawishi batemenwe sana Yosefe? Bandume nankwe ba kwa Yosefe balimufimbiile kabili balimupatile. Ilyo Yosefe alotele ifiloto ifyaibela, alyebeleko bandume nankwe. Balemona kwati ifiloto fyalelanga ukuti bushiku bumo bakamufukamina. Ici calengele bamupate sana!
Bushiku bumo, bandume nankwe balecema impaanga mupepi no musumba wa Shekemu. E ico Yakobo atumine Yosefe ukuyamona nga bandume nankwe bali fye bwino. Ilyo aleya balimumwene ninshi ali ukutali e lyo balanda abati: ‘Kalota wa filoto aisa. Iseni tumwipaye!’ E ico balimwikete no kumupoosa mu cilindi icitali. Nomba Yuda ndume nankwe atile: ‘Mwimwipaya! Lekeni tumushitishe fye pa kuti akayeba umusha.’ E ico balimushitishe kuli bashimakwebo abena Midiani abaleya ku Egupti. Bamushitishe pa indalama sha silfere 20.
Lyena bandume nankwe ba kwa Yosefe babulile ica kufwala cakwe no kucitumpika mu mulopa wa mbushi, e lyo bacitwala kuli shibo. Baebele shibo abati: ‘Bushe ici, te ca kufwala ca kwa Yosefe?’ Kanshi Yakobo alemona fye kwati inama ya mu mpanga e yaipeye Yosefe. Ala alyumfwile ububi sana ica kuti bonse balifililwe ukumusansamusha.
Ilyo Yosefe ali mu Egupti, balimushitishe ku walebombela kwi sano uo baleita ati Potifa, kabili ali umusha wakwe. Nomba Yehova alitwalilile ukupaala Yosefe. Potifa alimwene ukuti Yosefe alebomba bwino imilimo bamupeele kabili alimucetekele. Tapakokwele Potifa aebele Yosefe ukuba umukalamba wa babomfi bonse aba pa ng’anda.
Muka Potifa atendeke ukumona ukuti Yosefe ali umusuma sana kabili ali uwakosa. Kanshi cila bushiku aleeba Yosefe ukuti alaale nankwe. Cinshi Yosefe acitile? Alikeene kabili amwebele ati: ‘Awe! Ukucita ifi kubi. Bashikulu balincetekela sana kabili imwe muli bakashi babo. Nga nalaala na imwe nalabembukila Lesa!’
Bushiku bumo muka Potifa alipatikishe Yosefe ukuti alaale nankwe. Alimwikete mu fya kufwala fyakwe, lelo Yosefe alibutwike. Ilyo Potifa abwelele pa ng’anda, umwina mwakwe amwebele ukuti Yosefe alefwaya ukulaala nankwe. Alibepele. Potifa alifulilwe icine cine ica kuti alibikile Yosefe mu cifungo. Lelo Yehova alitwalilile ukupaala Yosefe.
“Muleicefya mwi samba lya kuboko kwa maka ukwa kwa Lesa, pa kuti akamusansabike ilyo inshita ikafika iya kuti amusansabike.”—1 Petro 5:6
Nalimo Kuti Mwatemwako ne fi
AMALYASHI YA MU BAIBOLO UMULI IFIKOPE
Yosefe mu Egupti
Kuti wasekesha shani Lesa nangu ca kuti takuli uulekumona? Belengeni ilyashi lya mu Baibolo pa kuti musambilileko kuli Yosefe.
AMALYASHI YA MU BAIBOLO UMULI IFIKOPE
Ilyashi lya Bana Abaume aba kwa Yakobo
Ufwile ukucita shani nga ca kuti ndume yobe nelyo nkashi yobe, nangu fye umunobe abuula icintu icisuma ico na iwe wingatemwa ukukwata?
IFIKOPE
Yosefe Bamushitisha mu Busha
Kopololeni no kupulinta ici icikope ico mwingapenta, kabili fwayeni ifintu fibili ifipusene ne fyo ilyashi lya mu Baibolo lilanda.
AMAKARDI
Kardi Pali Potifa
Kopololeni iyi kardi pa bantu abo Baibolo yalandapo, no kusambilila na fimbi pali Potifa, umwina Egupti uwali shikulu wa kwa Yosefe.
