Joseph a mbe mone wua ya ba Jacob a nga kandane biaé. A mbe fe mon ésa a mbe a dañe nye’e. Bobenyañe bé bevok be nga wô’otan aya, éyoñe be nga yene na, ésa wop a nye’e Joseph a dañe be? Be nga taté na ba bo Joseph éviele, a vini nye. Môs éziñ, Joseph a nga taté na a yem biyeyem bi to aval étam, ane a nga kañete bie bobenyañ. Be nga buni na biyeyem bite bia tinane na, môs éziñ, ba ye kute nye meboñe si. Ane be nga dañe beta vini nye.

A nga bo na, bobenyañe be Joseph be nga to be ba’ale mintômba fefele tison ba loone na, Sichem. Nde Jacob a nga lôme Joseph na a ke fombô nge be ne mvo’é. Éyoñe be nga yene nye a za’a ôyap, ane be nga taté na ba jô na: ‘Tama yenan, ñyeme biyeyem ate a nga zu. Bia zu wôé nye!’ Ane be nga bi nye a wua nye ébé été. Ve monyañe wé a mbe jôé na Juda a nga jô be na: ‘Te mia wôé nye! Bia zu kuane nye, a ke bo ôlo.’ Ane be nga kuane nye be bebo makit ya Madian be mbe be kele’e Égypte. Be nga kuane nye tañe bifase bi moné 20.

Éyoñe be kuaneya nye, bobenyañe bé be nga dube éyé jé metyi me ékela été, ane be nga lôme ésa wop éyé éte, be jô’ô na: ‘Tame fombô, ye sa ke éyé mone wôé di nga?’ Ane Jacob a nga buni na tite ya afan é nga wôé mone wé. Nde a nga wô’ô mintaé nlem. Teke môt a nga to ngule ya fôlô nye.

Éyoñ a kuiya Égypte, bebo makit ya Madian be nga kuane Joseph be Potiphar, beta môt ya Égypte. Ve Yéhôva a nji vuane Joseph. Potiphar a nga yene na Joseph a mbe a yeme bo ésaé jé, a na a ne môt be ne tabe nye ndi. Ane a nga telé nye na a jôé biôme bié bise.

 Minga Potiphar a nga yene na Joseph a ne ngul a abeñe môt. Ane a nga taté na a jô nye môs ane môs na, a jô’ôbô a nye. Nge ô mbe Joseph, ô nga ye bo aya? Joseph a nga ben, a jô na: ‘Teké’é! Masa wom a too me ndi, wo’o ki ô ne minga wé. Nge me jô’ôbô a wo, mé bo mbia jam e mis me Zambe!’

Môs éziñ, minga Potiphar a nga jeñe na a bi Joseph a ngul. Nde a nga tyebe nye biyé, ve Joseph a nga tup. Éyoñe Potiphar a nga bulane nda, ane minga wé a nga kate nye na, Joseph a te bi nye a ngul. Ve a mbe a laane minsos. Potiphar a nga wô’ô mbia ôlun, éyoñ éte a nga wua Joseph e mimbôk. Ve Yéhôva a nji vuane Joseph.