Yusufu tun ye Yakuba dencɛ dɔ ye. A kɔrɔcɛw y’a kɔrɔsi ko a koo ka di u faa ye ka tɛmɛ olu kan. Ele fɛ, o ye mun lo kɛ u la do? Yusufu ɲangoya y’u minɛ ani u y’a kɔniya. Yusufu ye siko kabakoman dɔw kɛ ani a y’o lakali a kɔrɔcɛw ye. U y’a miiri k’o sikow kɔrɔ ko olu bena biri Yusufu ɲɛɛ kɔrɔ loon dɔ. O kama, u y’a kɔniya tugun kosɔbɛ.

Loon dɔ, Yusufu kɔrɔcɛw tun be saga dɛndɛna Sisɛmu mara la. Yakuba ye Yusufu ci ko a ka taga a filɛ n’u be hɛɛrɛ la. U ye Yusufu natɔ ye fɔɔ yɔrɔjan ani u y’a fɔ ɲɔgɔn ye ko: ‘O sikobaga natɔ ye. An k’a faga!’ U y’a minɛ k’a fili dingɛ dunba dɔ kɔnɔ. Nka a kɔrɔcɛ dɔ, min tɔgɔ ko Zuda, ale ko: ‘An kana a faga! An k’a feere jɔnya la.’ Madiyan jagokɛlaw tun be tagara Ezipiti. U ye Yusufu feere u ma warigwɛ deen 20 na.

O kɔ, Yusufu kɔrɔcɛw y’a ka derekeba ɲigi bakɔrɔnin joli la. U tagara a yira u faa la ani u ko: ‘I dencɛ ka derekeba le tɛ?’ Yakuba y’a miiri ko kongosogo jugu dɔ ye Yusufu faga. A dusu tiɲɛna kojugu. Mɔgɔ si tun tɛ se k’a dusu saalo.

U ye Yusufu feere jɔnya la Ezipiti mɔgɔba dɔ ma min tun tɔgɔ ko Potifar. Nka Jehova tun be ni Yusufu ye. Potifar y’a ye ko Yusufu be baara ɲuman kɛ ale fɛ ani ko a be se k’a jigi la Yusufu kan. A ma mɛɛn, Potifar y’a bila a ka fɛɛn bɛɛ kun na.

Potifar muso y’a ye ko Yusufu tun cɛ ka ɲi ani ko a fari tun  dakɛɲɛnin lo. Loon o loon a tun b’a fɔ Yusufu ye ko a ka la n’ale ye. Yusufu tun bena mun lo kɛ? A banna ani a ko: ‘Ɔn ɔn! O ye koo jugu ye. Ne ka patɔrɔn lanin be ne la ani ele y’a muso ye. Ni ne lara n’i ye, ne bena Ala hakɛ ta.’

Loon dɔ, Potifar muso y’a ɲini ka Yusufu waajibiya a ka la n’ale ye. A ye Yusufu minɛ a ka fani ma, nka Yusufu bolila. Potifar nana soo tuma min na, muso ko Yusufu y’ale kɛlɛ. A ma tiɲɛn fɔ. Potifar dimina kosɔbɛ ani a ye Yusufu minɛ k’a don kaso la. Nka Jehova ma ɲinɛ Yusufu kɔ.