Em Jakob sin zweitjüngscht Sohn heisst Joseph. De Joseph isch sin Lieblingssohn. Und di ältere Brüedere vom Joseph merked das. Was denksch, wie fühled si sich echt? Si sind iifersüchtig uf de Joseph und hassed ihn. Irgendeinisch het de Joseph bsundrigi Träum und verzellt sine Brüedere devo. D Träum bedüted, dass si sich denn mal vor em Joseph verbüge müend. Wege dem hassed si de Joseph jetzt no meh!

Einisch sind d Brüedere vom Joseph i de Nöchi vo de Stadt Sichem am Schaf Hüete. De Jakob schickt de Joseph zu ihne, zum go luege, wies ihne gaht. Si gsehnd de Joseph scho vo Wiitem und säged zunenand: «Da chunnt de Träumer! Chumm, mir bringed ihn um!» Si packed de Joseph und rüehred ihn in es Loch. Aber eine vo sine Brüedere, de Juda, seit: «Nei, töted ihn nid! Mir verchaufed ihn lieber als Sklav.» Also verchaufed si de Joseph für 20 Silberstück a Händler us Midian, wo grad uf em Weg uf Ägypte sind.

Nachher tüend si em Joseph sis Chleid is Bluet vomene Geissbock tünkle. Si schickeds ihrem Vater und fraged: «Chasch mal luege, öb das s Chleid vom Joseph isch?» Da denkt de Jakob, dass es wilds Tier de Joseph gfresse het. Er isch eso truurig, dass ihn niemer cha tröschte.

In Ägypte wird de Joseph als Sklav an en wichtige Beamte verchauft, wo Potiphar heisst. Aber Jehova hilft em Joseph. De Potiphar gseht nämlich, dass de Joseph sini Arbeit als Sklav guet macht und dass mer ihm cha vertraue. Drum cha de Joseph zu allem luege, wo em Potiphar ghört.

Em Potiphar sinere Frau fallt de Joseph uf und si merkt, dass er guet usgseht. Immer wider möcht si de Joseph überrede, mit ihre z schlafe. Was macht de Joseph jetzt? Er wett nid und seit sofort: «Stopp, das wär falsch! De Potiphar vertraut mir und du bisch sini Frau. Wenn ich mit dir schlafe, mach ich e Sünd gege Gott.»

Amene andere Tag wett d Frau vom Potiphar de Joseph sogar zwinge, mit ihre z schlafe. Si packt ihn a de Chleider, aber er riisst sich los und springt devo. Wo de Potiphar hei chunnt, lügt sini Frau ihn a. Si behauptet, de Joseph heg wele mit ihre schlafe. De Potiphar wird eso verruckt, dass er de Joseph is Gfängnis laat la iisperre. Aber Jehova vergisst de Joseph nid.