Josẹfu yin dopo to visunnu pẹvi Jakọbu tọn lẹ mẹ. Mẹdaho Josẹfu tọn lẹ nọ mọdọ ewọ wẹ otọ́ yetọn yiwanna hugan. Numọtolanmẹ tẹwẹ a lẹndọ enẹ na ko hẹn yé tindo? Yé nọ whànwu Josẹfu bosọ gbẹwanna ẹn. Josẹfu wá kudlọ wunmẹ delẹ bo dọhona nọvisunnu etọn lẹ gandego. Nọvisunnu etọn lẹ lẹndọ zẹẹmẹ odlọ lọ lẹ tọn wẹ yindọ yé na wá dẹ́ do odò na ẹn to gbèdopo. Enẹ zọ́n bọ yé sọ gbẹwanna ẹn dogọ!

To gbèdopo, nọvisunnu Josẹfu tọn lẹ to nukunpedo lẹngbọ lẹ go sẹpọ tòdaho Ṣekẹmi tọn. Jakọbu do Josẹfu hlan nado yì pọ́n lehe yé te do. Whenue yé mọ Josẹfu hlan, yé dọna ode awetọ dọ: ‘Odlọ-gán lọ ko ja. Mì gbọ mí ni hù i!’ Yé wle e bo ze e dlan odò he siso de mẹ. Amọ́, Juda he yin dopo to nọvisunnu etọn lẹ mẹ dọmọ: ‘Mì ma hù i blo! Mì gbọ mí ni sà ẹ taidi afanumẹ.’ Yé sọ sà Josẹfu na ajọwatọ Midiani tọn he jei Egipti lẹ yin fataka-kuẹ 20.

Enẹgodo, nọvisunnu Josẹfu tọn lẹ ylọn tewu etọn do ohùn gbọgbọẹ de tọn mẹ bo hẹn tewu lọ yì otọ́ yetọn dè bosọ dọmọ: ‘Be e ma yin tewu visunnu towe tọn die ya?’ Enẹwutu, Jakọbu lẹndọ gbekanlin de wẹ na ko hù Josẹfu. E jẹflumẹ pete. Mẹde ma penugo nado miọnhomẹna ẹn.

To Egipti, Josẹfu yin sisà taidi afanumẹ na ahọluzọnwatọ nukundeji de he nọ yin Pọtifali. Amọ́, Jehovah tin hẹ Josẹfu. Pọtifali mọdọ Josẹfu nọ wazọ́n ganji bọ yè gán dejidego. E ma dẹn bọ Josẹfu yin dide do nutindo Pọtifali tọn lẹpo ji.

Asi Pọtifali tọn doayi e go dọ Josẹfu yọ́ndẹpẹ bo dohuhlọn taun. Egbesọegbesọ, e nọ to bibiọ to Josẹfu si dọ ni wá dọ́ emi dè. Etẹwẹ  Josẹfu na wà? E gbẹ́ bo dọ: ‘Lala! E ma sọgbe nado wàmọ. Ogán ṣie dejido go e, podọ asi etọn wẹ hiẹ. Eyin n’dọ́ dè we, Jiwheyẹwhe wẹ n’waylando do!’

To gbèdopo, asi Pọtifali tọn tẹnpọn nado hẹn Josẹfu po huhlọn po nado dọ́ e dè. E wle awù Josẹfu tọn hẹn, ṣigba ewọ họ̀n sọn e dè. Whenue Pọtifali lẹkọ wá whégbè, yọnnu lọ dọna ẹn dọ Josẹfu tẹnpọn nado dọ́ emi dè po huhlọn po. Lalodo wẹ e te. Homẹgble Pọtifali taun bọ e ze Josẹfu do gànpamẹ. Amọ́, Jehovah ma wọn Josẹfu.