Josef wa ri umwe wovanatje vaJakob ovaṱiṱi. Omarumbi we va muna kutja Josef ongwa suvererwe tjinene i ihe. Mo tjiwa kutja otjiṋa hi tje ve ṱuna vi? Owo aave ṱeruru na Josef nu ve mu tondere. Indu Josef tja kara noturoto otuhimise, eye wa raera omarumbi we ohunga na two. Owo aave munu kutja oturoto twi matu hee kutja owo eyuva rimwe mave kerikotamena ku ye. Nu owo ve mu humisira ko!

Eyuva rimwe omarumbi waJosef aaye tjevere ozonḓu meṋe yotjihuro tjaSikem. Jakob wa hindire Josef okukatara kutja omarumbi we ye ri vi. Owo va muna Josef okuza kokure nave utu okuraerasana kutja, “Tareye, omurote eye ngo we ya! Indjeye tu mu zepe!” Owo otji ve mu kambura nave mu yumbu motjitoto otjikoto. Posiya umwe womarumbi we wena Juda, wa tja: ‘Atu mu zepa kako! Ngatu mu randise otjomukarere.’ Otji ve mu randisa kovisilveri 20 kOvamidian ovarandise mbaave i koEngipte.

Okuzambo omarumbi waJosef va tjaveka ombanda ye mombinḓu yongombo, nave hindi ku ihe ave tja: ‘Ombanda yomuatje woye ndji poo indee?’ Jakob aa munu kutja otjipuka tjokuti otji tja zepa Josef. Eye wa hihamwa omutima tjinene. Kapari omundu ngwaa yenene okumuyarura omutima pehi.

Indu tji va kavaza koEngipte, Josef wa karandisiwa otjomukarere komuhongore wena Potifar. Posiya Jehova wa ri puna Josef. Potifar wa muna kutja Josef wa ri omuungure omuwa nu ovandu vari nongamburiro mu ye. Kombunda Josef wa zikwa kutja ma tjevere oviṋa vyaPotifar avihe.

 Omukazendu waPotifar wa muna kutja Josef wa ri omuwa tjinene mombuniko nu wa ri nomasa. Eyuva arihe eye aa ningire Josef kutja ma rare puna ye. Josef wa tjita vi? Eye wa panḓa na tja: ‘Kako! Katjiṋa otjiwa okutjita. Omuhona wandje u nongamburiro mu ami, nove oove omukazendu we. Indu tji mba rara puna ove me katuka komurungu waMukuru!’

Eyuva rimwe omukazendu waPotifar wa kondja okuṋiṋikiza Josef okurara puna ye. Eye otje mu handa kombanda, posiya Josef wa tupuka. Indu Potifar tje ya kondjuwo, eye wa tja Josef wa hara okumutjera. Eye kena wa hungira ouatjiri. Potifar wa pindikire tjinene, na patere Josef mondeko. Posiya Jehova kena pa zemba Josef.