Laj Jose aʼan jun rehebʼ li xkachʼinal ru ebʼ li ralal laj Jacob. Ebʼ li ras keʼxkʼe reetal naq laj Jose jwal raaro xbʼaan li xyuwaʼebʼ. Chanru nakaakʼoxla naq keʼrekʼa ribʼ? Jwal nekeʼxkaqali ut xikʼ nekeʼril. Saʼ jun kutan, chʼaʼaj bʼayaq li kixmatkʼe laj Jose ut kixseeraqʼi rehebʼ li ras. Aʼanebʼ keʼxkʼoxla naq aʼin xyaalalil ebʼ Ii matkʼ, naq saʼ jun kutan teʼxwiqʼibʼ ribʼ chiru laj Jose. Joʼkan naq, jwal xikʼ wiʼ chik xeʼril.

Saʼ jun kutan, ebʼ li ras laj Jose yookebʼ rilbʼal ebʼ li karneer chixkʼatq li tenamit Siquem. Tojaʼ naq, laj Jacob kixtaqla laj Jose chi rilbʼal chanru wankebʼ li ras. Naq xeʼril ru chi chalk chi najt, keʼok xyeebʼal: «Weʼ chaq laj matkʼ. Qakamsihaq!». Joʼkan naq, keʼxchap ut keʼxkut saʼ jun li chamal jul. Abʼan laj Juda, jun rehebʼ li ras, kixye: «Meekamsi. Qakʼayihaq choʼq moos». Ut joʼkan keʼxbʼaanu re. Keʼxkʼayi chiru 20 tumin re plaat rehebʼ laj yakonel re Madian li yookebʼ chi xik Egipto.

Chirix chik aʼan, ebʼ li ras keʼxtaqresi li raqʼ laj Jose rikʼin xkikʼel jun li chibʼaat, tojaʼ naq keʼxkʼam re li xyuwaʼebʼ ut keʼxpatzʼ re: «Ma maawaʼ re laawalal aʼin?». Laj Jacob kixkʼoxla naq jun li josqʼ aj xul kikamsink re, ut kʼajoʼ kirahoʼk saʼ xchʼool. Maaʼani kiruhank xkʼojobʼankil xchʼool.

Naq keʼwulak Egipto, laj Potifar, laj tenqʼahom re laj Faraon, kiloqʼok re choʼq xmoos. Abʼan li Jehobʼa wank chaq rikʼin laj Jose. Laj Potifar kixkʼe reetal naq laj Jose jwal chaabʼil nakʼanjelak ut naru nakʼeheʼk re yalaq kʼaru chi kʼanjel. Saʼ junpaat, laj Jose kikanaak choʼq aj ilol re chixjunil li xjunkabʼlal laj Potifar.

Li rixaqil laj Potifar kiril naq laj Jose jwal chʼinaʼus naʼilok ut wank  xmetzʼew, ut inkʼaʼ kixkanabʼ xyeebʼal re, naq tyoklaaq rikʼin. Kʼaru kixbʼaanu laj Jose? Maajunwa kixkʼulubʼa raatin ut junelik kixye re: «Inkʼaʼ, aʼin moko us ta. Laj echal we kaw xchʼool wikʼin, ut laaʼat rixaqil. Wi tinyoklaaq raj aawikʼin, tinmaakobʼq chiru li Yos».

Saʼ jun kutan, li rixaqil laj Potifar kixyal xminbʼal ru laj Jose re naq tyoklaaq rikʼin. Kixchap li raqʼ, abʼan laj Jose xkoho saʼ aanil. Naq laj Potifar kiwulak saʼ rochoch, li rixaqil kitikʼtiʼik chiru, kixye naq kiyaleʼk xchapbʼal xbʼaan laj Jose. Kʼajoʼ naq kichalk xjosqʼil laj Potifar ut kixkʼe saʼ tzʼalam. Abʼan, li Jehobʼa junelik kixjultika laj Jose.