Josef oumwe womovanamati vaJakob ovo vanini. Ovakulu vaye ova li va mona kutya Josef oku holike unene kuxe. Omolwashike mbela va li ve udite ngaho? Omolwaashi ova li va twila Josef ondubo nova li ve mu tonde. Eshi Josef a li a twa eendjodi de likalekelwa, okwa li e di hokololela ovamwaxe. Ova li va diladila kutya eendjodi odo otadi ti kutya efiku limwe otave ke mu twila eengolo. Ova li va tameka okukala ve mu tonde unene.

Efiku limwe fimbo ovamwaxe vaJosef va li koufita weedi popepi noshilando Sikem, Jakob okwa li a tuma Josef a ka tale kutya ovamwaxe ove li po ngahelipi. Ova li va monena Josef kokule, ndele tava lombwelafana tava ti: ‘Omutwi weendjodi oye oo tadi oko, natu mu dipaeni!’ Ove mu kwata ndele tave mu ekele melambo lile. Ndele omumwaxe umwe wedina Juda okwa ti: ‘Inamu mu dipaa, ndele ponhele yaasho natu mu landifei po moupika.’ Konima yaasho, ova landifa po Josef oisilveri 20 kovalandifi vokuMidian, ovo va li tava i kuEgipti.

Opo nee, ovamwaxe vaJosef ova dedaula oshikutu shaye mohonde yoshikombo, ndele tave shi tumu kuxe, nokupula xe tava ti: ‘Oshikutu eshi kashi fi shomonamati woye?’ Jakob okwa li ta diladila kutya Josef okwa dipawa koshifitukuti. Okwa li a nyika oluhodi neenghono, nokapa li oo a dula oku mu hekeleka.

Eshi ovashingifi vokuMidian va fika muEgipti, ova landifa po Josef e li omupika kelenga la fimana Potifar. Ashike nande ongaho, Jehova okwa li pamwe naJosef. Potifar okwa li a mona kutya Josef oha longo noudiinini nokwa li omulineekelwa. Konima yefimbo, Potifar okwa li a tula oinima yaye aishe mepashukilo laJosef.

Omukulukadi waPotifar okwa li a mona kutya Josef omulumenhu muwa moshipala nomunaenghono. Efiku nefiku okwa li ha pula Josef a  nangale naye. Mbela Josef okwa li a ninga po shike? Okwa li e shi anya ndele ta ti: ‘Ahowe, osha puka. Omwene wange okwe lineekela nge filufilu, ove omukulukadi waye. Ngeenge onda nangala naave, ohandi ka nyona kuKalunga.’

Efiku limwe omukulukadi waPotifar okwa li ta kendabala natango okufininika Josef a nangale naye. Opo nee okwe mu kwata moshikutu, ndele Josef ta faduka po. Eshi Potifar e uya meumbo, omukulukadi waye okwa li a popya oipupulu kutya Josef okwa li e mu ponokela. Potifar okwa li a handuka neenghono ndele ta tulifa Josef modolongo. Ashike, Jehova i na dimbwa omupiya waye Josef.