Josɛf na bin wan pan Jekɔp in bɔypikin dɛn. Josɛf in big brɔda dɛn bin si se na in dɛn papa lɛk pas dɛn ɔl. Aw yu tink se dɛn bin fil bɔt dat? Dɛn bin jɛlɔs Josɛf ɛn dɛn et am fɔ dat. We Josɛf bin de gɛt sɔm strenj drim dɛn, i bin de tɛl in brɔda dɛn bɔt dat. Dɛn bin tink se di drim dɛn min se dɛn go butu bifo am wan de. Dat bin mek dɛn et am mɔ!

Wan de, Josɛf in brɔda dɛn bin de kia fɔ dɛn ship dɛn nia wan siti we dɛn kɔl Shɛkɛm. Jekɔp bin sɛn Josɛf fɔ go si aw in brɔda dɛn de du. Dɛn si Josɛf de fa de kam, ɛn dɛn tɔk to dɛnsɛf se: ‘Luk di pɔsin we de drim de kam. Lɛ wi kil am!’ Dɛn ol am ɛn put am insay wan dip ol. Bɔt wan pan in brɔda dɛn we nem Juda se: ‘Una nɔ kil am! Bifo dat, lɛ wi sɛl am as slev.’ So dɛn sɛl Josɛf fɔ 20 silva mɔni to Midianayt biznɛsman dɛn we de go na Ijipt.

Dɔn Josɛf in brɔda dɛn put in kot insay got blɔd, sɛn di kot to dɛn papa, ɛn se: ‘Nɔto yu bɔypikin in kot dis?’ So Jekɔp fil se wan wayl animal dɔn kil Josɛf. In at bin pwɛl. Nɔbɔdi nɔ bin ebul fɔ ɛnkɔrej am.

Na Ijipt, dɛn bin sɛl Josɛf to wan bigman we nem Pɔtifa. Bɔt Jiova bin de wit Josɛf. Pɔtifa bin si se Josɛf sabi du in wok, ɛn i kin abop pan am. I nɔ tu te Pɔtifa bin mek Josɛf de oba ɔl in prɔpati dɛn.

Pɔtifa in wɛf bin si se Josɛf bin rili fayn ɛn strɔng. Ɛvride,  i bin de aks Josɛf fɔ ledɔm wit am. Wetin Josɛf bin du? I nɔ bin gri ɛn i bin se; ‘Nɔ-o! Dis na bad tin. Mi masta biliv mi, ɛn yu na in wɛf. If a ledɔm wit yu, a go sin agens Gɔd!’

Wan de, Pɔtifa in wɛf bin tray fɔ fos Josɛf fɔ ledɔm wit am. I bin grip in klos, bɔt i bin rɔnawe. We Pɔtifa kam na os, in wɛf tɛl am se Josɛf tray fɔ rep am. Na lay i bin de lay. Pɔtifa bin vɛks bad, ɛn i put Josɛf na prizin. Bɔt Jiova nɔ bin fɔgɛt bɔt Josɛf.