Josefa kwa kere muna Jakopo. Vakuru vendi va yi dimbwilire asi oguhwe yige va here po unene. Ngapi ono kugazara omu vakuru vendi va lizuvhire? Awo kwa mu fililire mfudu ntani kwa mu nyengere. Apa Josefa ga ya rotere nonzodi, age kwa di tanterere vakuru vendi. Nye tava gazara asi nonzodi odo kutanta asi ezuva limwe ngava mu tongamena. Tava mu nyenge nye unene morwa nonzodi dendi.

Ezuva limwe vakuru vendi kwa ka lisilire nonzwi pepi nositata saSikemu. Jakopo ta tumu Josefa aka va tare nsene va waawa. Awo kwa mu monene koure ta wiza, tava li tantere asi: ‘Tareni gokurota nonzodi googo ana kuwiza. Tu mu dipageni!’ Makura tava mu kwata va mu zugumine mekero. Nye mukurwendi gumwe Juda, ta tanta asi: ‘Twa ha mu dipaga, nye tu mu randeseni!’ Tava mu randesa yimaliwa yoyitenda 20 kovarugenda nzira ava va tembe koEgipite.

Tava gusa erwakani lyendi tava li tupike mohonde zosikombo, tava twara erwakani olyo koguhwe nokutanta asi: ‘Eli erwakani lyamunweni ndi?’ Jakopo kwa gazarere asi sikasama sa dipaga munwendi Josefa. Age kwa lilire unene. Kwato ogu ga vhulire kumuhengagwida.

Josefa kwa ka mu randesere hena ngomupika koEgipite kwaPotifara erenga lyaFarawo. Nye Jehova kwa kere kumwe naJosefa. Potifara kwa mwene asi Josefa kurugana unene ntani kuvhura kumuhuguvara. Potifara yipo ga tulire Josefa a takamese yininke nayinye yemembo.

MukadaPotifara ga mwene asi Josefa kwa kere norutu roruwa ntani muwa mosipara. Nga sininike Josefa nkenye ezuva asi va hondere.  Yisinke ga rugene ko Josefa? Age kwa nyokere ta tanta asi: ‘Hawe, olyo epuko! Hekurwange ga huguvara nge ntani ove mukadendi. Nsene ni hondera nove tani zono kwaKarunga.’

Ezuva limwe mukada Potifara kwa sininikire Josefa asi va hondere. Ta mu kwata kosikoverero, nye Josefa ta si mu sigire ta ka duka. Apa Potifara ga ka tengwire kembo, mukadendi ta mu kumbagere asi Josefa kwa here kumukwatera kononkondo. Apa ga yi zuvhire Potifara ta handuka unene ta tura Josefa modorongo. Nye Jehova kapi ga divarere Josefa.