Josef ne en achiel kuom yawuot Jakobo matindo. Owetene madongo nong’eyo ni Josef e ma ne Jakobo ohero ahinya moloyogi. Iparo ni ne giwinjo nade e wi wachno? Ne gibedo gi nyiego, kendo mano nomiyo koro ne ok gidware. Ka ne Josef oleko lek moko, ne onyiso owetene lekgo. Ne gineno ni lekgo ne nyiso ni kinde mabiro, ne gidhi kulore ne Josef ka gimiye duong’. Omiyo, ne gimedo mako kode sigu!

Chieng’ moro, owete Josef ne kwayo rombe but taon mar Shekem. Jakobo nooro Josef ir owetene mondo odhi one kaka tij kwath ne terogi. Ne gineno Josef gi kuma bor ka biro kae to ne giwacho niya: ‘Ero jalekcha biro. Wanegeuru!’ Ne giywaye ma gibole e bugo moro matut. Kata kamano, Juda ma bende ne en achiel kuom owetene ma ne nikanyo nowacho niya: ‘Kik unege yawa! To kar mano wauseuru kaka misumba.’ Kuom mano, ne giuse e nengo ma dirom fedha 20 ne jo ohala ma Jo-Midian ma ne kalo ka dhi Misri.

Bang’e ne gikawo law Josef ma gimienoe remo kae to ne gitero ne wuon-gi lawno kendo ne giwachone niya: ‘Donge mae en law wuodi?’ Mano nomiyo Jakobo oparo ni le mag bungu ne onego Josef. Nobedo gi kuyo ahinya. Onge ng’ato ang’ata ma ne nyalo hoye.

Ka ne en Misri, ofisa moro maduong’ miluongo ni Potifa ne ong’iewo Josef kaka misumba. Jehova ne nigi Josef. Potifa noneno ka Josef tije ber kendo ne inyalo gene. Bang’ kinde matin, noweyo gik moko duto ma ne en-go e lwet Josef.

Chi Potifa noneno ka Josef ne en jachia kendo dende ne ojengo. Pile ka pile nosiko kosayo Josef mondo onind kode. Josef ne dhi timo  ang’o? Notamore, kendo nonyise niya: ‘Ok anyal! Mae richo maduong’. Ruodha ogena ahinya, to in e chiege. Ka anindo kodi, abiro ketho ne Nyasaye!’

Chieng’ moro, chi Potifa notemo mako Josef gi thwon mondo onind kode. Nomako nanga Josef, kata kamano Josef noringo oa kanyo. Ka Potifa ne oduogo, chiege ne onyise ni Josef ne dwaro nindo kode gi thwon. Chi Potifa ne ok owacho adier. Potifa ne iye owang’ matek ma otueyo Josef e jela. Kata kamano, Jehova wiye ok nowil gi Josef.