Zozef ti enn parmi bann pli zenn garson Zakob. So bann gran frer ti trouve ki Zozef ti garson prefere zot papa. Dapre twa, ki zot ti resanti? Zot ti zalou ek zot ti ena laenn pou Zozef. Kan Zozef ti fer bann rev inpe bizar, li ti al rakont sa so bann frer. Dapre so bann rev, enn zour so bann frer ti pou azenou devan li. Depi sa zour-la, zot ti plis deteste Zozef ankor!

Enn zour, bann frer Zozef ti pe gardien bann mouton pre ar lavil Sishem. Zakob ti avoy Zozef pran zot nouvel. Me kan zot ti trouv Zozef pe vini delwin, zot ti dir ar zot kamarad: ‘Gete! Ala seki fer rev-la pe vini. Anou touy li!’ Zot ti trap Zozef ek zot ti zet li dan enn pwi bien fon. Me Zida, enn parmi bann frer Zozef, ti dir: ‘Pa touy li! Plito, anou vann li kouma enn esklav.’ Alor, zot ti vann Zozef pou 20 pies an-arzan ar bann marsan Madianit ki ti pe al Lezip.

Apre sa, bann frer Zozef ti pran so manto ek ti tranp li dan disan enn bouk. Zot ti avoy sa manto-la kot zot papa ek zot ti dir: ‘Pa manto to garson sa?’ Lerla, Zakob ti panse ki enn zanimo sovaz ti touy Zozef. Zakob ti bien sagrin ek personn pa ti kapav rekonfort li.

Dan Lezip, bann dimounn ti vann Zozef kouma enn esklav ar enn zom bien inportan ki ti apel Potifar. Me Zeova ti avek Zozef. Potifar ti remarke ki Zozef ti travay bien dir ek ki ti kapav fer li konfians. Bien vit, Potifar ti met Zozef an sarz lor tou seki li ti ena.

Madam Potifar ti remarke ki Zozef ti enn zoli garson ek ki li ti for. Toulezour li ti pe demann Zozef pou gagn relasion avek li.  Ki Zozef ti fer? Li ti refize ek li ti dir: ‘Non! Pa bon fer sa. Mo met ena konfians an mwa, ek twa, to so madam. Si mo gagn relasion avek twa, mo pou fer enn pese kont Bondie!’

Enn zour, madam Potifar ti esey fors Zozef pou gagn relasion avek li. Li ti trap Zozef par so linz, me Zozef ti sove. Kan Potifar ti retourn lakaz, so madam ti dir li ki Zozef ti esey gagn relasion avek li. Li ti pe koz manti. Potifar ti bien ankoler, ek li ti fer zet Zozef dan prizon. Me Zeova pa ti bliye Zozef.