Jozefu wali umwana umunono pa yana yakwe Yakobo. Ya silenzi yonsi yaweni ukuti Jozefu awino isi watemilwe sana. Uzye ukwelenganya ukuti yuvwanga uli pali vii? Yuvwilanga Jozefu uzuwa nupya yamupasile. Lino Jozefu walosile iviloto vimwi iviiyele, walondolwelile aina yakwe. Yelenginye ukuti viloto vivyo vyapiliulanga ukuti wanda umwi yalafukamila Jozefu. Na cii calenzile ukuti yamupate sana!

Wanda umwi aina yakwe Jozefu yacemanga imfwele mupiipi nu musumba uwa Syekemu. Yakobo watumile Jozefu mukulola vino aina yakwe yali. Lino aina yakwe Jozefu yamuweni akatalamukila yatandike ukulanda iyati: ‘Lolini kakalota aeka kiza. Lekini tukakome!’ Yamulemile iyamusumbila nu mu cifula icizike. Lelo Yuda, wenga pa ina yakwe Jozefu walanzile ati: ‘Mutamukoma! Lekini tumukazye sile umu uzya.’ Fwandi yakazizye Jozefu pa mpiya 20 zyakwe siuva uku yaculuzi Aina Midyani ayanga uku Ijipti.

Lyene aina yakwe Jozefu yatoozile icakuzwala cakwe iyacitimpika umu wazi nu kucitwala kuli isi nu kuya munena iyati: ‘Uzye cii i cakuzwala ca mwana winu?’ Fwandi Yakobo welenginye ati icinyama ica mpanga icikoma Jozefu. Uvwile sana uyi. Ataakweti nu wakumuteekezya.

Lino Aina Midyani yafisile uku Ijipti, yakazizye Jozefu ku muomvi umwi uwa kwi sano uwi zina lyakuti Potifa. Nomba Yeova wali na Jozefu. Potifa waweni ukuti Jozefu wamuombelanga ningo imilimo nupya cii calenzile ukuti Potifa amutaile. Pataleengile Jozefu wapeezilwe umulimo wakwangalila ivintu vyonsi vyakwe Potifa.

 Muci wakwe Potifa waweni ukuti Jozefu wali umusuma sana nupya wakweti amaka. Cila wanda wapatikizyanga Jozefu kuti alale nawe. Uzye Jozefu wacisile uli? Wakanyile nu kulanda ati: ‘Awe! Cisi cisuma ukucita vii. Musambazi wane wantaila nupya wewe muci wakwe. Ndi cakuti nalala naawe, ale nayembukila Leza!’

Uwanda umwi umuci wakwe Potifa wapatikizye Jozefu kuti alale nawe. Wamutinsile umu vyakuzwala, lelo Jozefu utwiike. Lino Potifa wawezile uku ng’anda, umuci wakwe wamunenyile ukuti Jozefu wali akumupatikizya ukulala nawe. Vino walanzile vitaali ivya cumi. Potifa wasosile sana icakuti wisile na Jozefu mu cifungo. Lelo Yeova atilile Jozefu.