A Zakoob ra tara kom-dibli 12. A Zozɛf n da yaa 11 soabã. A kẽem-dãmbã ra neeme tɩ b ba wã nong-a lame n yɩɩd bãmba. Fo mii rẽ sẽn kɩt tɩ b maan bɩ? B kisga a Zozɛfe. A Zozɛf wa n zãmsa zãmsdo, n tɩ togs a kẽem-dãmbã. Zãmsdã ra rat n yeelame tɩ daar n wat t’a kẽem-dãmbã na n yĩgimd n waoog yẽ. Rẽ kɩtame tɩ b kisg a Zozɛf n paase.

Daar a ye, a kẽem-dãmbã ra bee tẽng sẽn boond tɩ Sɩkɛm sẽnese, n gũud piisi. A Zakoob tʋma a Zozɛf t’a tɩ ges b sã n keemame. A kẽem-dãmbã sẽn wa n ne-a t’a bee yɩɩg n watẽ, b yeela taab yaa: ‘Ad zãmsdã soab sẽn wate. Wa-y tɩ d kʋ-a!’ B yõk-a lame n lob bulg pʋga. La a Zida yeel-b lame yaa: ‘D ra kʋ-a ye. D rɩk-a n koose, t’a lebg yamba.’ B wa n yãa neb sẽn yi Madiyã n debd Ezɩpt n na n tɩ koos teedo, tɩ b rɩk a Zozɛf n koos ne-ba, n deeg wanzuri ligd pisi.

Rẽ poore, a Zozɛf kẽem-dãmbã yõka bʋʋg n kʋ, n dɩk a fuugã n los zɩɩmã pʋgẽ, la b tɩ wilg b ba wã, n sok-a yaa: ‘Pa fo biigã fuug la woto?’ A Zakoob sẽn yã a Zozɛf fuugã, a tagsame tɩ we-rũng n wãb-a. A sũurã sãamame t’a yãbe, hal tɩ nebã belg-a n mak n konge.

Madiyã nebã sẽn ta Ezɩptã, b rɩka a Zozɛf n koos ne a Potifaar sẽn da yaa Ezɩpt nin-kãseng a ye wã. La a Zeova ra bee ne a Zozɛfe. A Potifaar yãame t’a Zozɛf tʋmda sõma, la tɩ b tõe n teeg-a lame. A kɩtame t’a Zozɛf get yẽ zakã bũmbã fãa yelle.

 A Potifaar pagã yãame t’a Zozɛf yaa rasãnga, n tar pãnga. Daar fãa, a ra yeta a Zozɛf t’a gãand yẽ. A Zozɛf maana wãna? A zãgsame n yeele: ‘Mam sã n maan woto pa sõma ye. Bala, fo yaa a Potifaar paga. Sẽn paase, mam sã n gãand foo, mam na n maana sẽn pa noom Wẽnnaam.’

Daar a ye, a Potifaar pagã makame n na n modg a Zozɛf t’a gãand yẽ. A gãda a Zozɛf fuugã, la a Zozɛf wudgame. A Potifaar sẽn wa wã, a pagã yaga ziri, n yeel t’a Zozɛf ra rata yẽ. A Potifaar sũurã yika wʋsgo, t’a kɩt tɩ b kẽes a Zozɛf bãens-roogo. La a Zeova pa tol n yĩm a Zozɛf yell ye.