José eliyaya Jacob ikone. Iikniuaj katli achtoui tlakatkej kiitakej inintata tlauel kiikneliyaya José. ¿Tlake timoiljuia kiyolmatiyayaj? Kikualankaitayayaj José pampa inintata san ya tlauel kiikneliyaya. Se tonali, José kitemijki tlen amo kema kitemiktoya uan kinpouilik iikniuaj. Inijuantij moiljuijkej tlen kitemiktoya kiijtosnekiyaya se tonali motlankuaketsaskiaj iixpa. Yeka nojua tlauel kikualankaitakej.

Kema José iikniuaj kinmokuitlauiyayaj ininborregojuaj nechka altepetl Siquem, Jacob kinauatik José ma kinitati. Kema iikniuaj kiuejkaitakej, kiijtojkej: “¡Xikitakaj, ne uala katli tlatemiki! Ma tijmiktikaj”. Uajka kiitskijkej uan kikuamajkajkej ipan se ostotl tlen uejkatla. Teipa, Judá kiniljuik: “Amo xijmiktikaj. Ma tijnamakakaj kej se tlatekipanojketl”. Uan kiampa kichijkej. Kinamakakej José ika 20 platatomij. Se keskij madiáneuanij katli yauiyayaj Egipto kikojkej José.

Teipa, iikniuaj kikalakijkej José iyoyo ipan ieso se cabra uan kiuikilijkej inintata nopa yoyomitl, uan kiiljuijkej: “Xikita tlaj iyoyo mokone”. Jacob moiljuik se tlapiali tlen mosisinia kimiktijtoya José, uan tlauel mokuesok. Amo aka ueliyaya kiyolchikaua.

Ipan Egipto, itstoya se tlakatl katli motokaxtiyaya Potifar uan kitekipanouayaya nopa tlanauatijketl. Potifar kikojki José kej itekipanojka. Maske eliyaya se tlatekipanojketl, Jehová nochipa kipaleuiyaya. Potifar kiitak José tlauel kipaktiyaya tekitis uan kiitak ueliskia motemachis ipan ya. Yeka kitlalik ma kimokuitlaui nochi tlen kipixtoya.

José kipixtoya miak chikaualistli uan yejyektsi eliyaya, yeka Potifar  isiua pejki kiixtoka uan ajachika kiiljuiyaya ma moteka iuaya. ¿Tlake kichiuayaya José? Amo kitlakakiliyaya uan kiiljuiyaya: “Amo, nopa amo kuali. Moueue motemachia ipan na, uan ta tiisiua. Tlaj nimotekas mouaya, nitlajtlakolchiuas iixpa toTeotsij”.

Se tonali, Potifar isiua kinejki kichiualtis José ma moteka iuaya. Maske kiitskik ipan iyoyo, José cholojtejki. Kema Potifar asito ichaj, isiua kiiljuik José kinejki kichiualtis ma moteka iuaya. Potifar tlauel kualanki uan tlanauatik ma kitsakuakaj José. Maske kiampa kipanok José, Jehová amo kema kitlauelkajki.