José katka semej ikoneuan Jacob akin okachi nojnelmej. Iikniuan akin tayekanayaj kiitakej ke ininpopaj okachi kitasojtaya José. ¿Keniuj tiknemilia ke momachiliayaj? Yejuan kitelnexikoluiayaj uan kitauelitayaj. Se tonal, José kipiak seki takochitalis tein tel taman uan kintapouij iikniuan. Nejon takochitalismej kijtosnekiaj ke se tonal yejuan moixpiloskiaj iixpan. Yejua ika, okachiok kitauelitakej.

Se tonal, iikniuan José kintakualtijtoyaj ichkamej kampa ika moajsia xolal Siquem. Ompa, Jacob kititanik José maj kinitati iikniuan keniuj moajsiaj. Keman kiuejkaitakej, peuak kijtouaj: “Ne ualajtok ne takochitakej. ¡Maj tikmiktikan!”. Yejua ika kikitskijkej uan kipankajkaujkej itech se uejkatan talkoyok. Sayoj ke Judá, semej iikniuan, kijtoj: “Amo xikmiktikan. Okachi kuali maj tiknamakakan kemej takeual”. Uan yejua nejon kichiujkej. Kinnamakiltijkej ika 20 platajtomin seki tanamakanij kayomej Madián akin yayaj Egipto.

Satepan, iikniuan José kiajakijkej itilmaj itech iesyo se cabra, kiuikilijkej tilmaj ininpopaj uan kitajtanijkej: “¿Amo iaxka mokonetsin nejin?”. Jacob kinemilij ke se tapial kimiktij José uan moteltayokoltij. Amo akin uelia kiyolseuiaya.

Ompa Egipto, se takat ueyichiujkej akin monotsaya Potifar kikouak José kemej itakeual. Sayoj ke Jiova kipaleuiaya José. Potifar kiitak ke José kuali tekitia uan ke uelia iuan takuaujtamatia. Amo uejkauak, kiixtalij maj taixyekana itech nochi tein kipiaya.

Inamik Potifar kiitaya ke José kuakualtsin katka uan chikauak, uan mojmostaj kiluiaya maj iuan motekani. ¿Toni kichiuaya José?  Kiixtopeuaya uan kiluiaya: “Amo, nejon amo kuali yetok. Noteko notech takuaujtamati, uan tejua tiinamik. Komo nimotekaskia mouan, nitajtakojtoskia iixpan Dios”.

Se tonal, inamik Potifar kitemoj kichikaujkauis José maj iuan motekani. Kikitskij ika itilmaj, sayoj ke José cholojteuak. Keman Potifar ajsik ichan, inamik kiluij ke José kinekia iuan motekas, sayoj ke nejon amo melauak katka. Potifar tel kualanik uan tanauatij maj kitsakuanij. Sayoj ke Jiova amo kielkauak José.