Josef, omwanamati gwaJakob noye a landulwa konkelo, Benjamin. Aamwahe aakuluntu oya li ye shi kutya he, Jakob, oku hole unene Josef. Oya li ye shi uvitile ngiini? Oya li ya sile Josef ondumbo noku mu tonda. Sho Josef a li a yaguma oondjodhi ndhoka tadhi limbilike, okwe dhi lombwele aamwahe. Mbela oya li yi inyenge ngiini? Oya ti kutya nani Josef okwa hala yi inyongamene kuye siku limwe. Shono oshe ya ningitha ye mu tondelele.

Oshikando shimwe aamwahe yaJosef oya li ye li noonzi dhahe popepi noshilando Shekem. Jakob okwa tumu Josef a ka tale kutya oye li po ngiini. Oye mu monene kokule noyi ilombwele taya ti: “Omumentu gwoondjodhi oye ngwiyaka te ya. Ileni tu mu dhipageni.” Oye mu kwata e taye mu umbile momuthima. Mbela Juda okwa ningi po shike? Okwa lombwele yakwawo a ti: ‘Inatu mu dhipageni. Pehala lyaashono, natu mu landithii po a ka ninge omupika.’ Opo nduno oye mu landitha po iisiliveli 20 kaahalithi Aamidiana, mboka ya li yu uka kuEgipiti.

Okuza mpono aamwahe yaJosef oya dhipaga oshikombo e taya yaya onguwo ye mombinzi yasho. Onguwo ndjoka oye yi tumu kuhe, e taya ti: “Yi tala nawa, ngele oyomumwoye.” Sho Jakob e yi mono okwa tuula oonguwo dhe molwoluhodhi. Okwa li ti ipula kutya Josef okwa lika po. Onkee ano, Jakob okwa tindi okuhekelekwa.

Sho Aamidiana ya thiki muEgipiti oya landitha po Josef kuPotifar, elenga lyomukwaniilwa gwaEgipiti. Jehova okwa li pamwe naJosef. Potifar okwa li a ndhindhilike kutya Josef oha longo iilonga ye nawa noku shi okwiinekelwa. Potifar okwa li a ningi po shike? Okwa ningi Josef elenga lye, a tonatele egumbo lye niinima ye ayihe.

Josef okwa li omumati gwondjelo ombwanawa noku na oonkondo, shono sha ningitha omukulukadhi gwaPotifar e mu haluke. Esiku nesiku okwa li ha  thiminike Josef a lale naye. Josef okwa ningi po shike? Okwa tindi, e ta ti: ‘Aawe, osha puka. Mwene gwandje okwa ningi ndje omutonateli gwaayihe, kakele koye. Ngele onda lala nangoye, otandi yono kuKalunga.’

Esiku limwe, omukulukadhi gwaPotifar okwa kondjitha Josef a lale naye. Omukulukadhi okwa kwata Josef monguwo, ihe Josef okwa fadhuka po. Sho Potifar e ya megumbo, omukulukadhi gwe okwa ningi po shike? Okwa lundile Josef a ti kutya okwe mu ponokele. Sho Potifar e shi uvu okwa geye noonkondo. Okwa tula Josef mondholongo, ihe Jehova ina dhimbwa Josef.